I dërguari special i Bashkimit Evropian për dialogun ndërmjet Kosovës dhe Serbisë, Miroslav Lajçak, ka njoftuar se do të udhëtojë në Shtetet e Bashkuara të Amerikës, ku me partnerët e tij do të diskutojë për zgjidhjen e krizës në Kosovë.
“Do të shkoj në Uashington me ftesë të partnerëve të mi nga SHBA. Do të kemi diskutime intensive se si të arrijmë progres dhe për hapat e menjëhershëm të ardhshëm”, ka shkruar Lajçak në Facebook.
Hapat drejt de-përshkallëzimit
Ai tha se në forumin e Prespës për dialogun gjendja në veri të Kosovës ka qenë temë kryesore e të gjitha diskutimeve dhe se gjatë kësaj jave ka njoftuar ambasadorët e NATO-s dhe BE-së për situatën në veri, duke shtuar se është e nevojshme të ndërmerren hapa drejt de-përshkallëzimit.
“Në fillim të kësaj jave, i informova kolegët e mi në Bruksel për vizitën time të fundit në rajon, situatën aktuale dhe rrugën përpara. Gjatë vizitës në selinë e NATO-s u takova edhe me zëvendëssekretarin e përgjithshëm të NATO-s, Mircea Geoan dhe u pajtuam që është e nevojshme të ndërmerren hapa urgjent për deeskalim”, ka theksuar Lajçak.
Tensionet e ngritura
Shefi i diplomacisë evropiane, Josep Borrell, ka ftuar presidentin e Serbisë, Aleksandar Vuçiç dhe kryeministrin e Kosovës në një takim në Bruksel, pas tensioneve të reja në veri të Kosovës që filluan në fund të majit, por ende nuk ka marrë konfirmim nga dyshja në fjalë për një takim të tillë.
Kryeministri i Kosovës tha se përshkallëzimi në veri është pasojë e bojkotit të zgjedhjeve të jashtëzakonshme lokale të prillit në katër komunat veriore, për shkak të presionit të Beogradit ndaj serbëve vendorë për bojkotimin e zgjedhjeve.
Tensionet u rritën më tej pasi policia serbe arrestoi tre pjesëtarë të policisë së Kosovës të mërkurën.
Policia e Kosovës ka bërë të ditur se tre policë janë “rrëmbyer” nga Kosova në afërsi të vendkalimit Jarinje, ndërsa Beogradi pretendon se janë arrestuar jo në territorin e Kosovës, por në territorin e Serbisë.
Pas kësaj, autoritetet e Kosovës ndaluan hyrjen e kamionëve nga Serbia në Kosovë, si dhe atyre që transportojnë mallra serbe.
Në shkurt, Serbia dhe Kosova pranuan planin evropian për normalizimin e marrëdhënieve të mbështetur nga SHBA, pastaj në mars në Ohër dhe Aneksin për zbatimin e asaj marrëveshjeje, por që nga ai moment nuk është arritur përparim në dialog për shkak tensioneve në veri të Kosovës. /tesheshi.com/
