Edhe pse ka qenë një nga anëtarët e shtabit të përgjithshëm të UÇK-së, Lahi Brahimaj (daja i kryeministrit Haradinaj) nuk jep shifër se sa ushtarë kanë qenë siç bëjnë disa ish-komandantë të zonave. Fajin për gjithë hallakamën që po ndodh rreth kush është veteranë i vërtetë e kush i rremë po ja lë ligjit që ka trajtuar këtë kategori.
Ish-prokurorin Elez Blakaj e quan një dezertor, ndërsa shton pyetjen pse u dashtë që ai të ikë nga vendi në fund të procesit?
Brahimaj në intervistën dhënë për tesheshi.com flet edhe për aktakuzën ngritur ndaj ish-komisionit qeveritar, por jo vetëm…
Intervistoi: Blendi Gashi
Pak kush mund ta ketë menduar se çështja e veteranëve mund ta trazonte shtetin. Ju si ish-komandat i UÇK-së si e shihni rrëmujën e krijuar? Pse eskaloi në këtë mënyrë?
Lufta e UÇK-së është luftë e shenjtë dhe si e tillë duhet të ruhet dhe promovohet nga të gjithë. Nuk kemi eskalim, por kemi një situatë jo shumë të mirë dhe për më tepër konfuze se si do te procedohet tutje. Çdo herë kemi thënë se Ligji që i trajton këto kategori nuk është i qartë dhe prandaj kemi ardhur në këtë gjendje, sigurisht pak edhe me “ndihmën” e disa dashakqinjëve, por besoj që do të gjendet rruga dalëse.
Disa ish-komandat thonë se UÇK-ja ka pasur 13 mijë ushtarë, disa 20 mijë. Sipas juve sa kanë qenë?
Secili nga ish-komandantët e UÇK-së ka opinionin e vet rreth asaj se sa ushtarë kanë qenë zona operative ku ka operuar, pra sa ushtarë kanë pasur nën komandë.
Mendoj se UÇK-ja ka qenë ushtri e organizuar nga populli dhe rrjedhimisht në luftë për liri dhe secili me kontributin e tij/saj ka bërë që vendi ynë të jetë i lirë.
Ç’mendoni për ish-prokurorin Blakaj që hetonte listat e veteranëve dhe iku në SHBA siç thotë pasi në Kosovë u kërcënua?
Krejt gjërat duhet të bëhen transparente, pse “dezertoj” ish-prokurori, pse u dashtë që të pritet fundi i këtij procesi për të ndodhë kjo (ikja e tij në SHBA). Duke mos dashur të lëshohem në komentimin e veprimeve të prokurorit në fjalë, mendoj se mbështetja e deklaruar dhe e faktuar nga kryeministri për sistemin e drejtësisë por edhe për ish-prokurorin në fjalë thotë shumë dhe jep dyshimin në krejt çka ka deklaruar ky ish zyrtar i sistemit prokurorial. Por megjithatë i mbetet në ndërgjegje atij dhe gjithsecilit që në momente kyçe të Kosovës tentojnë dhe angazhohen që të bëjnë “avokatin e djallit” për të nxjerre gjithëfarë ngjarjesh për ta dëmtuar imazhin e vendit në arenën ndërkombëtare.
Prokuroria së fundmi publikoi një listë me 1300 emra të “veteranëve mashtrues” e që jo pak ish-ushtarë të vërtetë gjenden emrat aty, çka reaguan fuqishëm. Prokurori Blakaj ka deklaruar se këta emra i janë shtuar aktakuzës së tij. Kush qëndron prapa kësaj loje ?
E thash në fillim, luftën e UÇK-së, luftëtarët e saj, s’do mundet askush t’i mohoj e as t’i njollos. UÇK është themeli i këtij vendi, ndërsa dëshmorët dhe veteranet e saj janë shtylla mbi të cilat po ndërtohet Kosova jonë. Kot harxhojnë energji disa shërbëtorë të së keqes, por UÇK-në, nuk ka arritur ta gjunjëzoj e as ta zhbëjë e gjithë ajo ushtri e polici e Serbisë, e s’do t’ia arrijnë as sot, kushdo qoftë që tenton dhe e ka për mision një gjë të tillë.
Tashmë ka një aktakuzë të ngritur ndaj ish-komisionit shtetëror të veteranëve në krye me Agim Çekun. A besoni se drejtësia kosovare do thotë fjalën e saj në mënyrë që vlera e UÇK-së të mos nëpërkëmbet?
Vlera e UÇK-së nuk besoj që është nëpërkëmbur e do të nëpërkëmbët nga komisioni shtetëror i veteranëve e as nga ish- komandantët e zonave. Përkundrazi drejtësia vihet në vend për këtë kategori vetëm duke ia dhënë hakun secilit njeri të këtij vendi që ka dhënë kontributin e vet për liri e pavarësi. Ligji duhet të përshtatet me çka ka ndodhur në periudhën e luftës. Siç e thash më lartë, UÇK-ja nuk ka pasur organizim të njëtrajtshëm, por secila zonë dhe secila periudhë e luftës i ka pasur specifikat e veta të organizimit. /tesheshi.com/
