Mensur Krasniqi
Pas dy anulimeve të njëpasnjëshme të seancës gjyqësore për 37 të akuzuarit për terrorizëm në rastin “Lagja e Trimave”, Gjykata e Shkupit sot ka vazhduar me seancën e radhës. Si çdo seancë tjetër, edhe sot të akuzuarit njëzëri kanë ripërsëritur qëndrimin e tyre kategorik se nuk janë terroristë, ashtu siç pretendon Prokuroria publike e Maqedonisë në aktakuzën e tyre.
Njëri ndër të akuzuarit, Nasuf Beqiri në seancën e sotme ka deklaruar se tragjedia që ndodhi në Kumanovë më 9 maj të vitit të kaluar ka arkitektin e saj. Sipas tij ky luftim është orkestruar nga politikanët e Maqedonisë.
“Ky është një skenar i inskenuar nga politikanët. Na thirrën e pastaj na tradhtuan. Vetëm që të shpëtojnë vet. Por plani u doli huq. Po shkojnë thellë e më thellë. Ne kemi shumë gjëra për të treguar por do t’ia lëmë kohës. Kërkojmë që këtë rast ta marrë Prokuroria Speciale. Kërkojmë intervenimin edhe të faktorit ndërkombëtar, ka deklaruar Nasuf Beqiri, i akuzuar.
I akuzuari tjetër Muhamet Krasniqi, i ka quajtur qesharake akuzat ndaj tij dhe bashkëluftarëve të tij. Ndërsa 8 personat tjerë që së fundi u futën në paraburgim të ngarkuar me aktakuzë gjoja se kanë luajtur rolin e logjistikës për përkrahjen e grupit të Kumanovës, sipas Krasniqit janë persona tërësisht të panjohur dhe se për këtë jepte garanci jetën e tij.
“As unë, as Sami Ukshini, nuk jemi organizator të grupit, ashtu si duan që të na akuzojnë. Nga ndihmësit, ju garantoj me jetë se nuk e njoh asnjërin, ndërsa në shtëpitë në Lagjen e Trimave jemi futur me dhunë”, deklaroi Krasniqi.
Me seancën e sotme, procesi gjyqësor për ngjarjet e 9 dhe 10 majit nisi nga fillimi, pasi Prokuroria gjatë fillimit të muajit maj me këtë lëndë i bashkoi rastin “Rrufeja” me çka tetë persona janë të akuzuar për dhënien e logjistikës për përkrahjen e grupit të Kumanovës.
Kujtojmë se më 9 dhe 10 maj të vitit 2015 në Lagjen e Trimave të Kumanovës grupi i armatosur u përlesh me forcat e sigurimit të Maqedonisë. Gjatë shkëmbimit tw zjarrit humbën jetën tetë policë nga njësitet speciale dhe të veçanta të MPB-së dhe rreth katërmbëdhjetë u plagosën rëndë. U vranë edhe dhjetë persona të grupit të armatosur. Mes tyre ishin ushtarët e njohur të UÇK-së, Mirsad Ndrecaj dhe Beg Rizaj. Për këta dy të fundit, siç kanë njoftuar shokët e tyre në paraburgim, nuk janë vrarë gjatë dyluftimit, por pasi janë arrestuar nga policia. /tesheshi.com/
