Mensur Krasniqi
“Mëngjese tmerri” tashmë kanë filluar të bëhen ditët kur në Gjykatën Themelore të Shkupit nga burgjet e ndryshme barten të akuzuarit për rastin e Kumanovës. Qytetarët ndjehen të frikësuar dhe revoltuar nga paniku që shkaktojnë organet policore. Me qindra policë të armatosur, tanke e helikopterë shëtisin rrugëve të Shkupit për çdo seancë gjyqësore, me arsyetimin se bëhet fjalë për grup terrorist që mund të arratisen.
Sipas profesorit universitar Afrim Osmanit komunikacioni paraqet një nga boshtet kyqe të lëvizjes së lirë të njeriut.
Ndërsa bllokimi i komunikacionit me orë të tëra dhe paniku që shkaktojnë organet policore dëshmojnë për paaftësinë e institucioneve shtetërore që të ballafaqohen lehtësisht me raste të tilla gjyqësore.
“Komunikacioni paraqet një nga boshtet kyçe të lëvizjes së lirë të njeriut. Qarkullimi i lirë i njeriut paraqet një nga liritë dhe të drejtat e njeriut që mund të kufizohen vetëm me vendim gjyqësor, por kjo ka të bëj vetëm me raste individuale. Pra mund të kufizohet vetëm për personin i dyshuar për vepër penale por jo edhe për personat tjerë.
Ajo që ndodhë tek ne me bllokimin e rrugëve në rastet e mbajtjes së seancave gjyqësore që zhvillohen për vepra penale për të cilët parashihen dënime të larta me burgim, por përveç kësaj edhe me pretekst se mund të organizohet arratisje ose sulm tjetër eventual. Kjo shkakton frikën e institucioneve shtetërore për bllokim i tërë komunikacionit. Përmes kësaj dëshmohet paaftësia e institucioneve shtetërore të merren me raste të këtilla të rënda”, deklaroi për portalin tesheshi.com, profesori universitar Afrim Osmani duke shtruar pyetjen çka nëse para gjyqësorit tonë paraqiten më tepër raste të këtilla?., atëherë sipas tij, bllokohet jo vetëm komunikacioni por i tërë sistemi i vendit.
Portali tesheshi.com ka arritur të kontaktojë edhe zëdhënësen e Sektorit të Punëve të Brendshme të Shkupit. Ajo sqaroi se varrësisht prej nivelit të rrezikshmërisë së veprave penale dhe personave të akuzuar për ato vepra SPB-Shkup i ndërmerr të gjitha masat preventive për sigurimin si të personave të akuzuar ashtu edhe të komunikacionit.
“Kur kemi kështu lloje të seancave gjyqësore, gjithmonë policia e komunikacionit nga Sektori i Punëve të Brendshme Shkup i ndërrmer të gjitha masat preventive të sigurimit të personave të akuzuar, po njëkohësisht edhe sigurimin e komunikacionit të papenguar. Kjo ndodh në të gjitha rastet kur kemi të bëjmë me persona të nivelit të rrezikshëm”, deklaroi Liza Bendevska.
Ndërkaq, procesi gjyqësor për “Lagjen e Trimave” vazhdon sot në Gjykatën Themelore Shkup 1 me dëgjimin e dëshmitarëve të mbrojtur.
Nga Gjykata kanë informuar se seanca e sotme do të jetë e mbyllur për opinionin, ndërsa dëshmitarët e mbrojtur do të japin dëshmi me propozimin e Prokurorisë Publike.
Për rastin e “Lagjes së Trimave” janë akuzuar gjithsej 29 persona për terrorizëm dhe organizim terrorist për ngjarjet më 8 dhe 9 maj në Kumanovë. Gjatë të shtënave jetën e humbën tetë policë nga njësitë speciale të MPB-së, dhjetë persona nga grupi i armatosur dhe mbi dyzet u lënduan rëndë.
/tesheshi.com/
