Stefano Pioli është ndëshkuar nga ish-skuadra e tij. Interi, edhe pse luante në fushën e vet, është eliminuar nga Lacio në çerekfinalet e Kupës së Italisë ndërsa gjendej në momentin më të mirë.
Futbolli është plot befasi. Një e tillë qe këtë mbrëmje. Interi vinte pas një serie të gjatë fitoresh; në të kundërt, Lacio kishte humbur të shtunën ndaj Kievos, e dyta humbje radhazi në kampionat. E megjithatë, skuadra e kryeqytetit italian arriti ta shkruante emrin në gjysmëfinale.
Lacio fitoi 1-2 në “Giuseppe Meazza”. Felipe Anderson shënoi fillimisht në minutën e 20-të, për ta dyfishuar rezultatin Biglia në minutën e 56-të me 11-metërsh.
I mbetur me dhjetë lojtarë pas daljes me të kuqe të Miranda-s, Interi bën çmos të kthejë rezultatin. Forcat barazohen në fushë kur kartoni i kuq i nxirret dhe Radu-së në minutën e 76-të.
Brozovic shkurtoi shifrat në të 84-tën minutë me një gjuajtje të zgjuar me kokë. Presioni i mëpastajmë nuk dha më rezultat, me ndeshjen të mbyllur në favor të Lacios.
Nesërmbrëma luhet çerekfinalja e fundit, ajo mes Romës dhe Çezenës. Nëse nuk do të ketë ndonjë të papritur të madhe, Roma është e destinuar ta kalojë me sukses këtë sfidë.
E nëse Roma mposht Çezenën, e pret derbi me Lacion në gjysmëfinale. Çifti tjetër është përcaktuar tashmë, Juventus – Napoli. Ndryshe nga gjer tani, gjysmëfinalet janë me dy takime. /tesheshi.com/
