Ish-drejtuesja e Partisë së Drejtësisë, Labinotë Murtezi- Demi, e cila në zgjedhjet e 11 qershorit ka garuar për deputete nën petkun e AKR-së së Pacollit ka reaguar pas shkrimeve mediale, sipas të cilave, atë e lënë jashtë Kuvendit.
Murtezi-Demi ka thënë se po bëhet presion medial mbi kandidatët për deputetë, duke thënë se është tentativë joetike dhe profesionale për të krijuar një opinion në favor ose disfavor qoftë të një partie a të një individi.
Ajo ka bërë me dije se sipas të dhënave të siguruara nga shtabet komunale, ajo është femra e gjashtë më e votuar brenda koalicionit LDK- AKR-Alternativa.
“Kjo radhitje është vlerësuar në bazë të informatave të siguruara nga shtabet komunale, KKZ-të në mënyrën zyrtare dhe ato të publikuara në media,ndërsa trendi i numërimit të votave po shkon vazhdimisht kah ngritja në pozitën e pestë. Ju siguroj se me vëmendjen më të madhe po përcjell çdo zhvillim sa i përket numërimit të votave, ngase besimi juaj për mua është amaneti juaj, dhe si të tillë do ta ruaj e do ta respektoj. Faleminderit për mbështetjen tuaj të treguar gjatë gjithë fushatës elektorale, për qytetarinë e treguar në ditën e votimit më 11 qershor, dhe mbi të gjithë për dashamirësinë dhe pritjen e ngrohtë në çdo takim”, ka shkruar Murtezi-Demi./tesheshi.com/
