Deputetja e deritanishme nga radhët e Partisë së Drejtësisë, Labinotë Demi-Murtezi ka bërë të ditur se që nga mbrëmë nuk është më pjesë e strukturave udhëheqëse të kësaj partie.
Përmes një postimi në Facebook, Demi-Murtezi ka thënë se një vendim të tillë e ka marrë si pasojë e zhvillimeve të shumta në kundërshtim me statusin e partisë.
“Mospajtueshmëria në shumë pika të organizimit të brendshëm deri në situata të papërballueshme të një komunikimi të ulët, ishin të patejkalueshme për mua me ç’rast edhe u detyrova të distancohem nga ajo mënyrë e menaxhimit të partisë”, ka shkruar ndër tjerash Demi-Murtezi.
Ja postimi i plotë i Demi-Murtezit:
Të nderuar qytetarë!
Të nderuar anëtarë dhe simpatizantë të Partisë së Drejtësisë!
Më lejoni t’ju njoftoj se nga mbrëmë unë më nuk jam pjesë e strukturave udhëheqëse të Partisë së Drejtësisë.
Zhvillimet e shumta në kundërshtim me statutin e partisë, mospajtueshmëria në shumë pika të organizimit të brendshëm deri në situata të papërballueshme të një komunikimi të ulët, ishin të patejkalueshme për mua me ç’rast edhe u detyrova të distancohem nga ajo mënyrë e menaxhimit të partisë.
Programi i partisë me të cilën kam punuar plot gjashtë vite, është artikulim i vlerave tona të përditshme, vlera të popullit me traditë të lartë kombëtare e fetare.
Ato vlera mbesin sublime për t’i kultivuar, dhe kësisoj do të vazhdoj të jap kontributin tim edhe politik, me shpresë se një ditë Partia e Drejtësisë do të frymojë e lirë në kuptimin e plotë të fjalës mbi bazën statutore që ka, me mundësi të një hapësire edhe më të madhe për demokraci brendapartiake.
Ju falënderoj nga zemra për mbështetjen dhe kurajon që më keni dhënë, për të gjitha këshillat dhe kritikat e vazhdueshme që për mua kanë qenë gjithmonë shumë domethënëse.
Vazhdoni të punoni aty ku i shihni vlerat reale dhe përkushtimin e madh, ngase shoqëria jonë ka shumë nevojë për kristalizimin dhe reflektimin publik të vlerave të saj, në dobi të organizimit më të mirë të jetës shoqërore e politike.
Me respekt,
Labinotë Demi-Murtezi.
Labinotë Demi – Murtezi është e para femër me shami që hyri në Kuvendin e Kosovës si deputete e Partisë për Drejtësi, e udhëhequr nga doktor Ferid Agani. Por kjo forcë politike së fundi po ka probleme, ku largimi i Demi – Murtezit, i disati në radhë, është tregues i një situatë jo të mirë, për shkak të disa zhvillimeve të brendshme. Mjaft të thuhet se zyrtarisht, kreu i saj vijon të jetë Agani, të paktën e referuar nga KQZ-së së Kosovës që e njeh për të tillë, ndërsa së paku një pjesë e saj realisht drejtohet nga Sulejman Çekrezi/tesheshi.com/
