Qyteti i Bunol, në provincën spanjolle të Valencias, ishte sërish vendi i “luftës së domates”, pra festivalit La Tomatina, një manifestim që është kthyer në një simbol të Spanjës.
Në festival, 15,000 pjesëmarrës konsumuan rreth 120 ton domate, të sjella nga gjashtë kamionë. Dhjetë tonë domate u përdorën këtë vit më pak se vitin e kaluar.
Njerëz nga e gjithë bota morën pjesë në festivalin tradicional, i cili sot kontribuon ndjeshëm në turizmin spanjoll. Rrugët e qytetit të vogël ishin krejtësisht të kuqe pas betejës dhe vizitorët shfrytëzuan rastin për të fotografuar pas betejës.
Rrugët u pastruan shpejt pas kësaj ngjarje.
Ata që pasi kaluan kontrollin e sigurisë, hynë në rrugët ku po bëhej “lufta” e domates, nuk u lejuan të mbanin me vete sende të mprehta apo të forta.
Festivali La Tomatina filloi zyrtarisht në 1945. Edhe atëherë në Bunol bëhej një festival, por nuk kishte qitje me domate dhe asgjë tjetër. Një nga të pranishmit, i mërzitur, filloi të gjuante me shqelma çdo gjë që haste.
Kështu e rrëzoi tezgën e perimeve dhe më pas u bë një zhurmë e përgjithshme dhe të gjithë i hidhnin perime njëri-tjetrit. Situata u qetësua vetëm pas ndërhyrjes së policisë. Në vitet në vijim, vizitorët në festival filluan të sillnin domate nga shtëpitë e tyre dhe t’ia hidhnin ato njëri-tjetrit.
Festivali zhvillohet çdo vit të mërkurën e fundit të gushtit. Që nga viti 2013, numri i biletave për festivalin ka qenë i kufizuar.
Së bashku me lojën me dema, lufta me domate është ndër ato identitete spanjolle tejet të diskutueshme nga pikëpamja etike. /tesheshi.com/
