Reali i Madridit pret tani i qetë të shohë se ç’do të ngjasë në përballjen me Espanjolit dhe Barcelonës në mbrëmje, ndërkohë që ka arritur të sigurojë vetë një fitore të mundimshme ndaj Valencias në “Santiago Bernabeu”.
Në këto pak javë që kanë mbetur, edhe gabimi më i vogël kushton një kampionat të tërë, dhe pikërisht pranë një gabimi të tillë ishte këtë pasdite Reali.
Në 90 minuta me shi e të tensionuara, madrilenët fituan 2-1 ndaj Valencias.
Miqtë do t’u mungonte saktësia dhe përqendrimi që në çastet e para, kur patën mundësi të shënonin. Megjithatë, goli i parë i ndeshjes erdhi në minutën e 27-të nga Ronaldo, që shënoi në një goditje me kokë.
I njëjti lojtar do të çonte dëm një 11-metërsh në minutën e 57-të, kur mund të thellonte rezultatin. Për portierin brazilian të Valencias, Diego Alves, kjo ishte penalltia e tretë që i priste Ronaldo-s.
E në fakt Ronaldo nuk duhet bërë aq me faj, pasi Alves njihet si një ekspert në pritjet e kësi gjuajtjeve;
mendoni: në 51 penallti të gjuajtura, ai ka pritur 25 prej tyre!
Për Realin situata do ndërlikohej në minutën e 82-të, kur Dani Parejo ekzekuton mrekullueshëm një goditje dënimi nga një distancë e largët. Topi përfundon në pikën ku bashkohen dy shtyllat, në të djathtë të portierit Navas.
Barazimi 1-1 do të zgjaste vetëm katër minuta. Për Realin mendon Marcelo, që brenda zonës së rreptësisë gjuan rrafsh me tokën dhe e çon topin në rrjetë.
Në “Bernabeu” ndjehet menjëherë lehtësimi kur takimi përfundon 2-1. E vështirë fitorja, por shumë e vlefshme.
Reali kryeson tani me 81 pikë; me tre pikë më pak, Barcelonës i duhet patjetër fitorja ndaj Espanjolit. /tesheshi.com/
