Madrilenët siguruan një fitore të çmuar këtë pasdite në transfertën ndaj Atletik Bilbaos. Një fitore që u garanton atyre qëndrimin në krye të renditjes së kampionatit spanjoll, madje me diferencë pikësh ndaj ndjekësve më të afërt.
Kjo ishte fitorja e njëzetë e Realit në 27 takime të luajtura. Një fitore që u duk e lehtë në 45 minutat e para, ndërsa miqtë nga Madridi patën epërsinë e vendasit ishin të pështjelluar në organizimin e tyre.
Në lojë me treshen e njohur sulmuese, Benzema, Bale, Cristiano Ronaldo, rezultatin do ta zhbllokonte francezi në minutën e 25-të.
Goli i Aduriz-it në pjesën e dytë, në minutën e 65-të, dha përshtypjen se gjërat po merrnin për mbarë për vendasit, veçse tre minuta më vonë Casemiro u preu rishtas krahët.
Përpjekjet e Atletik Bilbaos nuk u konkretizuan më, çka e bëri skuadrën pritëse t’i dorëzohej humbjes 1-2.
Me pesë pikë më shumë se Barcelona e vendit të dytë, Reali pret i qetë të shohë se ç’do të bëjnë rivalët, që luajnë të dielën. Atletiko e Madridit dhe Sevilja ndeshen në 16:15, ndërkohë që në mbrëmje të së njëjtës ditë, në 20:45, Barcelona luan ndaj Valencias në “Camp Nou”. /tesheshi.com/
