Nga tre ekipet që e kanë diskutuar kampionatin tradicionalisht midis tyre në vitet e fundit, Atletiko e Madridit pati nisjen më të keqe të këtij sezoni. Humbja e finales së Champions League-s muaj më parë dukej se kishte lënë gjurmë te futbollistët, që nisën ta marrin veten dalëngadalë.
Pas shtatë javësh, Atletiko e Madridit ka marrë kryesimin e kampionatit spanjoll. 0-2 ka fituar skuadra e Diego Simeone-s ndaj Valencias në fushën e kësaj të fundit. Griezmann e Gameiro i ka dhënë tre pikë të çmuara Atletikos me golat e tyre.
Po aq pikë sa Atletiko, 15 të tilla, ka dhe Reali i Madridit, duke u renditur në vend të dytë në klasifikim për shkak të golavarazhit më të dobët.
Reali i Madridit barazoi 1-1 me Eibarin në “Santiago Bernabeu”. Ishte ky barazimi i katërt radhazi i Realit, njëri më zhgënjyes se tjetri. Fran Rico shënoi për Eibarin në minutën e gjashtë, një epërsi e zhvlerësuar nga goli i Bale-it në minutën e 17-të.
Më keq shkoi puna mbrëmë për Barcelonën, që humbi 4-3 me Selta Vigon. Vendasit kryesuan 3-0 brenda 33 minutave në “Estadio de Balaidos”, ndërkohë që katalanasit arritën ta ngushtojnë rezultatin. Gjithsesi, fundi i buzëqeshi Selta Vigos, që siguroi tre pikë të çmuara ndaj një Barcelone që pa Messi-n shpesh humb kontrollin.
Barcelona ka zbritur në vend të katërt, pasi vendin e tretë e mban Sevilja, që të shtunën fitoi 2-1 ndaj Alavesit. /tesheshi.com/
