Të besuarit e Diego Simeone-s janë kthyer me pikë të plota nga udhëtimi i vështirë në “Balaidos” përballë Celta Vigos. Një fitore 0-2 e arritur me shumë mundim, por e shpërblyer me vendin e parë në renditje, njëherësh dhe kampione dimri në Primera Division.
Nikoqirët e thanë fjalën e tyre gjatë pjesës së parë të lojës, veçse pa arritur të marrin rezultatin e shumëkërkuar. Si gjithmonë, në 45-minutëshin e dytë të lojës, kuqebardhët arrijnë t’i shfrytëzojnë mundësitë e vetme, duke e dërguar kështu dy herë topin në portën kundërshtare. Francezi fantastik, Antoine Griezmann, e realizoi golin e parë në minutën e 49-të, teksa dhjetë minuta para fundit të lojës i mbylli llogaritë Carrasco.
Me dy pikë para Barcelonës, që ka një ndeshje më pak të zhvilluar, Atletico Madrid e mbyll pjesën e parë të kampionatit si lider, duke lënë prapa edhe rivalin e kryeqytetit, Real Madrid-in. /tesheshi.com/
