Ibrahim Bashës, ish-pjesëtarit të RENEA-s të vrarë dy vjet më parë në Lazarat, i është kushtuar një monografi që ka për autorë dyshen Kujtim Boriçi – Arben Duka.
“Për njerëzit që kanë bërë sakrificën supreme në të mirë të atdheut shoqërisë, sa më shumë kalojnë ditë, muaj e vite, aq më shumë del në pah madhështia e personalitetit dhe aktit të tyre, duke shtuar ndërkohë vlerësimin, mirënjohjen dhe respektin tek familjarët, shokët, miqtë dhe komuniteti i gjerë. Kështu ndodh dhe me Ibrahim Bashën, “Dëshmorin e Kombit”, ushtarakun model që dha jetën në krye të detyrës më shumë se një vit më parë në një operacion kundër aktivitetit kriminal në Lazarat të Gjirokastrës. Vështirë që familjarët, shokët dhe miqtë të mësohen me mungesën fizike të tij, por teksa shohin aktivitetin e tij disavjeçar në Komando e Speciale, ku ishte gjithmonë në pararojë e gjithmonë i vlerësuar, më tepër u shtohet ndjesia se ai është e do të jetë gjithmonë midis tyre, i gjallë, frymëzues dhe i qeshur…”, shkruhet ndër të tjera në parathënien e monografisë.
Ibrahim Basha u vra gjatë një prite në Lazarat, në një situatë jo shumë të tensionuar, por që shoqërohej nga dëshpërimi i një pjese të kultivuesve nga mbyllja e biznesit të hashashit. Që pas vrasjes së tij, Lazarati ka rënë përfundimisht në qetësi, ku nuk shihen më as patrulla policore në hyrje të fshatit. Ndërsa një pjesë e madhe e të rinjve e kanjë braktisur atë duke u larguar jashtë vendit. Vërtet, tashmë Lazarati nuk vlen për asgjë. /tesheshi.com/
