Ndërsa flasim për integrim në unionin evropian e standarte jetese, një raport ndërkombëtar i prish “festën” Shqipërisë. Mesa duket, në gjithë këtë zhurmë mediatike është ndër të vetmit me “këmbë në tokë”, pasi e pozicionon vendin tonë përkrah vendeve të treta në botë, sa i takon kushteve të sigurisë në punë.
Organizata Ndërkombëtare e Punës (ILO) në studimin e fundit për punësimin nën standard në të gjithë botën, e rendit Shqipërinë ndër vendet e fundit të listës.
Rreferuar punësimit të përkohshëm të punonjësve sipas gjinisë në sektorin e shërbimeve, vendi ynë zë vendin e 13-të, pas shteteve si Bangladeshi, Afganistani, Nepali, Mongolia, Ruanda etj.
Nga ana tjetër, në krahasim me shtetet europiane, u pozicionua ndër vendet që ka përqindjen më të vogël të punonjësve që punojnë më pak se 35 orë në javë.
Në vendin e parë në këtë drejtim qendron Holanda, ku rreth 45 për qind e punonjësve shpenzojnë më pak se 35 orë në javë, kurse Shqipëria radhitet ndër vendet e fundit të listës, ku vetëm 10 për qind e punonjësve në total e kanë këtë luks.
Kushtet e sigurisë në punë e kanë përmendur vendin tonë disa herë si ndër të vetmet që nuk i zbatojnë rregullishit, referuar veçanërisht aksidenteve të shumta në miniera. Në Bulqizë dhe Librazhd janë shënuar shumë raste, me pasoja fatale për minatorët.
Orët e pakta të punës në rang jave janë në luks i vërtetë për punonjësin shqiptar, ku shumica as nuk i pretendojnë, përballë kushteve skandaloze që detyrohen të punojnë me çdo lloj kriteri, që favorizon punëdhënësin, kuptohet.
Në shumë subjekte private kryesisht, diskutohet çeshtja e pagës në fund të muajit, pasi në shumë raste marrja e saj lihet në mëshirë të fatit e nëse i lind në zemër sipërmarrësit, në të kundërt punëtorët duhet të zgjedhin alternativën “borxhe”./tesheshi.com/
