Njeriu që do tentojë të sfidojë Erion Veliajn në kryeqytet, në zgjedhjet lokale të majit, do jetë Belind Këlliçi. Pas marrëveshjes Berisha-Meta, Këlliçi, një emër nga të rinjtë e PD-së, doli e tha, duke nisur fushatën, se “Erion Veliaj është i vetmi njeri që mund të ketë konkurruar Edi Ramën për abuzime në detyrë”.
“Jam i kundërt nga modeli Veliaj. Nuk jam i shantazhueshëm nga askush”, theksoi ai.
Si një emër i ri në politikë, dalë pak vite më parë kur u zgjodh kreu i FRD-së, Këlliçi nuk përbën ndonjë befasi në performim politik. Lëvrues i një ligjërimi aspak mbresëlënës, nuk shquhet as si ndonjë ideator politik.
Me emrin e tij, për aq protagonizëm sa ka në politikë, lidhen denoncimet, akuzat, por jo ndonjë kauzë e veçantë, produkt dhe i ndonjë fantazie politike.
Në ndryshim nga Veliaj ka të mos qënit për asnjë çast faktor publik jopolitik. Veliaj u fut si faktor i tillë në politikë, si kryeprotagonist mjaftist, duke ia patur nevojën madje dhe PD-ja për të riardhur në pushtet, siç në 2005-ën. Ndërsa Këlliçi, veç të qenit emër në PD, nuk i ofron publikut, si imponues, asgjë tjetër “jopolitike”. /tesheshi.com/
