Pas vërshimit të opinioneve dhe lajmeve për luftën në Ukrainë dhe trajtimin e inflacionit, qëndron një lajm relativisht i panjohur në lidhje me Kinën, sipas deklaratave të Jim Hanos në konferencën Delivering Alpha të organizuar nga agjencia e lajmeve CNBC në New York.
Hanos, i cili shpesh flet kundër ekonomisë së dytë më të madhe në botë, theksoi se kriza në tregun e pronave të Kinës mund të ketë implikime globale për momentin.
“Nëse nuk do të duhej të merrnim parasysh efektet e luftës në Ukrainë apo inflacionin dhe lëvizjet e bankës qendrore, mendoj se gjendja e tregut të pasurive të paluajtshme në Kinë do të ishte në qendër të vëmendjes së analistëve”, tha investitori i njohur.
Kina po përballet me një krizë të madhe e cila është për shkak të faktorëve të shumtë dhe që ka çuar në uljen më të ndjeshme të blerjeve të reja të pasurive të paluajtshme në vend që nga fillimi i viteve ’90.
Në përpjekje për të përballuar krizën, autoritetet kineze kanë marrë së fundmi masa për të mbështetur ekonominë, si uljen e normave të interesit për hipotekat 5-vjeçare. Duhet theksuar se pandemia vazhdon dhe përkeqëson situatën në vend, pasi “politika zero e rasteve” të Kinës po mbyt aktivitetin ekonomik.
Sipas Jim Hanos, “ccmimet kineze të pasurive të paluajtshme janë, përveç obligacioneve qeveritare, asetet më të rëndësishme në botë për momentin dhe nga të gjitha llogaritë ato janë aktualisht në një rënie të konsiderueshme. Ne kemi qenë dëshmitarë të një krize të vërtetë në tregun e pasurive të paluajtshme të Kinës gjatë 18 muajve të fundit, të cilën qeveria kineze me sa duket nuk mund ta kontrollojë. Rëndësia qëndron në faktin se ky treg i veçantë përbën pothuajse 50% të totalit të ekonomisë kineze”.
Sa i përket Evergrande dhe falimentimit të tij, Hanos theksoi se problemet nuk kufizohen vetëm në të: “Ashtu si në Tokio të Japonisë, pothuajse çdo kompani e madhe në Kinë ka një sektor të konsiderueshëm investimesh në pasuri të paluajtshme. Ky nuk është një problem që prek vetëm kompanitë e ndërtimit. Kjo është diçka që prek të gjithë ekonominë dhe nuk duhet të vazhdojmë ta injorojmë”. /tesheshi.com/
