Numri i qytetarëve në Bashkimin Evropian që kërcënohen nga varfëria dhe përjashtimi social duhet të ulet me 15 milion në 2030, thanë përfaqësuesit e Komisionit Evropian dhe Këshillit të BE, duke prezantuar në Parlamentin Evropian Planin e Veprimit për Evropën në kuadër të asaj që quhet Shtylla e të Drejtave Sociale.
Plani i Veprimit për Shtyllën Evropiane të të Drejtave Sociale (EPSR) është një thirrje për veprim kolektiv për të forcuar më tej të drejtat sociale në mënyrë që Evropa të rikuperohet nga kriza aktuale dhe të kryejë transformimin e nevojshëm dixhital dhe të gjelbër të ekonomisë dhe shoqërisë së saj.
Në seancën plenare të PE, eurodeputetët u drejtuan nga Komisioneri Evropian për Punësimin dhe të Drejtat Sociale Nicolas Schmit dhe ministrja portugeze për Çështjet Evropiane Ana Paula Zacarias, vendi i së cilës aktualisht mban presidencën e Këshillit të BE.
“Plani i veprimit sjell jetë të re në 20 parimet e Shtyllës Sociale dhe përcakton tre qëllime për 2030, të cilat duhet të pasqyrojnë një ambicie të përbashkët. Kjo është që, të paktën 30 përqind e popullsisë nën moshën 32 vjeç duhet të punësohen deri në vitin 2030, të paktën 60 përqind e të gjithë të rriturve duhet të përfshihen në ndonjë formë trajnimi çdo vit, dhe numri i njerëzve në rrezik të varfërisë dhe përjashtimi shoqëror duhet të ulet me të paktën 15 milion në 2030,” tha Schmitt.
“Ne besojmë se këto janë qëllime realiste, të cilat janë minimumi që do të duhet të arrihet,” shtoi ai.
Plani i veprimit për Shtyllën Evropiane të të Drejtave Sociale u miratua nga KE javën e kaluar.
“Ne e miratuam planin sepse qytetarët evropianë presin dhe duan të veprojnë në fushën sociale. Kjo është një thirrje për veprim kolektiv në përballjen me sfidat e ardhshme dhe na sjell masa konkrete për zbatimin e mëtejshëm të parimeve të Shtyllës Evropiane”, tha Schmit. /tesheshi.com/
