Policia arriti të kapë personin që plagosi aktivistin demokrat në një zyrë elektorale në Kavajë. Pra, është fjala për shtetasin Ndriçim Jonuzi.
Vetë Basha ishte në Kavajë duke pretenduar se bëhet fjalë për një akt me motive politike, ku sipas tij, njeriu që qëlloi Bledar Okshtunit ishte urdhëruar nga Rama.
“Sonte Kavaja është përballur me një ngjarje të rëndë! Një atentat kundër Partisë Demokratike, kundër Aleancës për Ndryshim, nga një kryeministër që e di se të dielën ai humb, Kavaja Fiton dhe Shqipëria fiton!”, tha Basha, por pa ofruar ndonjë fakt që e lidh njeriun që ka qëlluar me ndonjë aferë politike.
Në Kavajë qe dhe Meta, ku në stilin e tij shpërtheu kundër Ramës.
Por ky i fundit mohoi që ngjarja të kishte motiv politik.
“Plagosja e Kavajës e patolerueshme! Autori duhet çuar në pranga sa më shpejt! Politizimi i kësaj ngjarjeje është po aq i keq sa vetë ngjarja! LB duhet të bashkohet me mua për të mbështetur drejtësinë pa nxitur tensionin, ndërsa IM duhet ta ndalë fushatën idioteske të tensionimit”, shkroi Rama. /tesheshi.com/
