Palët në Gjykatën Penale Ndërkombëtare (ICC) të premten zgjodhën britanikun Karim Khan si prokurorin e ri, për një mandat 9-vjeçar duke filluar në 16 qershor.
Khan fitoi në një votim të fshehtë ndaj tre kandidatëve të tjerë dhe do të zëvendësojë kryeprokuroren Fatou Bensouda.
Gjykata me bazë në Hagë, e cila filloi të funksionojë gati 20 vjet më parë, ka juridiksion mbi krimet e luftës, krimet kundër njerëzimit, gjenocidin dhe krimet e agresionit.
Karim Khan drejtoi një ekip të posaçëm kërkimor të KB që merrej me krimet e ISIS-it në Irak. Në karrierën e tij ligjore 27-vjeçare, ai ka punuar për pothuajse çdo gjykatë penale ndërkombëtare, qoftë në prokurori, mbrojtje apo si këshilltar i viktimave.
Administrata e ish-presidentit amerikan Donald Trump vendosi sanksione vitin e kaluar ndaj stafit të gjykatës, duke përfshirë edhe vetë Bensouda, pas njoftimit të një hetimi mbi krimet e mundshme të luftës të kryera në Afganistan, të cilat do të përfshinin ato të kryera ndoshta nga trupat amerikane.
Muajin e kaluar, një zëdhënës i Departamentit të Shtetit tha se administrata e Presidentit të ri Joe Biden do të “rimendojë thellë” sanksionet kundër zyrtarëve të ICC.
Gjykata më pas njoftoi javën e kaluar se ka juridiksion mbi krimet e luftës të kryera në territoret palestineze, e cila mund të çojë në një hetim që kundërshtohet fuqimisht nga Izraeli dhe Shtetet e Bashkuara, të cilat nuk janë anëtare të gjykatës.
Një nga vendimet e para të Khan mund të jetë nëse do të shkojë më tej me një hetim të plotë në territoret palestineze ku Bensouda tha se kishte arsye të arsyeshme për të konkluduar se krimet e luftës mund të ishin kryer nga të dy forcat, si nga ato izraelite dhe si nga grupet e armatosura palestineze. /tesheshi.com/
