Ben McAdams, kryebashkiaku i Salt Lake City është bërë një yll i vërtetë mediatik. Për të përjetuar në lëkurën e tij ndjenjën e të qenurit një i pastrehë në qytetin të cilin e administron personalisht, ai vendosi që kalojë tri ditë në rrugë dhe në strehimore.
Pasi kishte kaluar natën e parë përjashta në rrugë, kurse të dytën në strehimore, ai pranoi se përvoja e tij gjatë këtyre netëve në disa mënyra ishte vërtetë tronditëse, njofton Deseret Neës.
Këshilla e parë që ai kishte mësuar, ishte që të mos zbathë këpucët dhe të mos shkojë në tualet pasi të errësohej, si dhe një numër përvojash të pazakonta gjatë aventurës së tij. Megjithatë, ai thotë se nuk kishte zgjedhur këtë veprim për shkak të publicitetit, por për të mbledhur faktet e nevojshme, para se të përzgjedhë vendin adekuat për një vemdstrehim të ri për të pastrehët.
Ai konsideroi se bazuar në përvojën e tij personale, do të ishte në gjendje që të vlerësojë më mirë situatën reale në terren dhe nevojat e këtyre njerëzve. Natën e parë ai fjeti në rrugë, ngase donte të dinte përse dikush preferonte të flejë në trotuar, në vend të strehimores.
“Nuk jam ndier i sigurt, absolutisht”, tha McAdams, duke shtuar se jeta në rrugë ishte shumë kaotike dhe se kishte arritur të flejë vetëm katër orë. Megjithatë, disa nga njerëzit e pastrehë me të cilët ai kishte biseduar, i kishin thënë se për ta ishte më mirë që të jetonin në rrugë, sepse në këtë mënyrë ata mund të qëndronin larg nga droga dhe dhuna e bandave në strehimore.
Mu për këtë arsye, natën e dytë, kryebashkiaku McAdams e kaloi në një strehimore, ku ai ishte dëshmitar i skenave të tmerrshme, nga njerëzit që injektonin droga në venë, te erërat e tymit nga drogat te cilën i tymosnin, e deri te rrahjet brenda.
Pas gjithë kësaj përvoje, McAdams vendosi që familjet që jetojnë në strehimoret për të pastrehët, të zhvendosen në një vend të sigurt, dhe se do të punojë për të zvogëluar nivelin e krimit në qytet. /tesheshi.com/
