Myftiu i Gostivarit Shaqir Fetahu është zgjedhur kryetar i Bashkësisë Islame të Maqedonisë Veriore, duke i dhënë fund kështu epokës së Sulejman Rexhepit, një individ plot dritëhije që e mbajti këtë post prej shumë vitesh.
“Sot është një ditë e mrekullueshme për të gjithë muslimanët në Republikën e Maqedonisë Veriore. Sot, Bashkësia Islame ka fituar. Që nga sot, ne kemi besim dhe përgjegjësi të madhe për të përfaqësuar Islamin në frymën origjinale dhe tradicionale. Rruga jonë do të jetë njohja, transparenca dhe puna e palodhshme në shërbim të besimtarëve dhe qytetarëve. Do të ketë një komunitet islam që do t’i përgjigjet me mençuri të gjitha vështirësive që ka sjellë koha”, tha Reis Shaqir Fetahu.
Shaqir Fetahu lindi më 25 prill 1959 në fshatin Çegran të Gostivarit. Pasi mbaroi medresenë në Prishtinë, ai studioi në Fakultetin e Shkencave Islame në Sarajevë. U bë hafiz Kur’an që në moshën 15-vjeçare.
Fetahu zvëvëndësoi përkohësisht Sulejman Rexhepin në krye të Bashkësisë Islame të Maqedonisë Veriore. Ndodhi kjo pasi Rexhepi pushua nga puna në mes të këtij viti për vendimin e tij për t’u martuar me një grua 50 vjet më të vogël se ai. Pasi lajmi për martesën e tij arriti në media, Sulejman Rexhepi u largua menjëherë nga pozita e Reisit. /tesheshi.com/
