Liljana Gjonaj është një nënë që i ka rënë një hall i madh mbi kokë. Prej dy muajsh ajo nuk e sheh të birin, Mariglen Gjonaj, 16 vjeç, që është zhdukur në mënyrë misterioze, ngjarje kjo e ndodhur në Fushë Mamurras të Kurbinit.
Ka qenë data 18 maj, kur Marigleni ka zgjedhur të kalojë një ditë me bashkëmoshatarët e tij të shkollës së mesme të Mamurrasit, në një aktivitet shlodhës, karakteristik për stinën e pranverës. Por që nga ajo ditë ai nuk është kthyer më në shtëpi, duke humbur siç thonë pa nam e pa nishan.
E vetmja gjë që dihet, është se ai është shoqëruar gjatë gjithë asaj dite nga një shok i afërt, banor po ashtu i zonës, Kristian Cenaj 23 vjeç. Ky i fundit është thirrur disa herë në polici gjatë hetimeve intensive që po zhvillohen, por thotë se e ka lënë Maranglenin atë ditë në qendër të Mamurrasit, e se nuk di më se çka ndodhur me të.
Ndërkaq, banorë të zonës thonë se vërtet e kanë parë atë ditë Mariglenin të jetë në automjetin e Cenajt. E ëma e Mariglenit të gjitha dyshimet i përqëndron vetëm tek Cenaj, pasi thotë se deklarimet e tij janë kontradiktore.
Sa për arsyet e vrasjes, si e keqja më e madhe që i shkon ndërmendje, dyshon se ajo mund të bërë për motive grabitjeje, pasi Marigleni ka patur shumë bizhu në trup, orë e varëse deri diku të shtrenjta.
Kërkimet vazhdojnë të mos rreshtin për dy muaj, si nga familjarët e saj e si nga strukturat policore, por deri më tani nuk ka asnjë rezultat.
Liljana Gjonaj, 42 vjeçe, u kërkon me ngulm strukturave shtetërore që të bëjnë çmos për ta gjetur të birin e zhdukur, gjallë a vdekë, pasi një brengë e madhe po e mundon.
Dhe kjo është fatkeqësia e dytë për këtë grua brenda pak kohe, pasi tre vite më parë humbi burrin, të cilin ia vrau një bashkëfshatar për arsye pronësie. /tesheshi.com/
