Kuveyt Türk, një bankë islame me qendër në Turqi, hapi të mërkurën të parën degë të saj në Gjermani, tërë shërbimet bankare të së cilës janë në përputhje me ligjin islam, duke u bërë kështu institucioni i parë financiar në vend që operon kësisoj.
Nisma e parë e kësaj banke për t’u shtrirë në Gjermani nisi në vitin 2010, kur ajo hapi një zyrë të vogël në Baden-Wuerttemberg, Mannheim. Dy vite më pas banka do t’u drejtohej autoriteteve gjermane me kërkesën për një licensë të plotë të veprimtarisë bankare.
Kuveyt Türk, që e ka qendrën në Stamboll, është një prej bankave më të mëdha në Turqi, pjesë e Kuwait Finance House, të zotëruar më së shumti nga investitorët kuvajtianë.
Kreu i bankës Kuveyt Türk, Kemal Ozan, u shpreh se 21 për qind e 4.5 milionë turqve që banojnë në Gjermani janë të gatshëm të përdorin shërbimet e një banke islame, duke iu referuar një anketimi të bërë nga vetë kompania.
Bankat islame kanë rezultuar të suksesshme në tregjet e Anglisë dhe Francës. Britania është qendra kryesore e financave islame në Europë, me pesë banka islame. /tesheshi.com/
