Parlamenti i hap dritën jeshile Vettingut duke miratuar tre anëtarët e Komisionit ad hoc.
Në seancën e jashtëzakonshme ku ka munguar opozita ka pasur një votim dramatik që ka sjellë pakënaqësinë e hapur të Shpëtim Idrizit, kreut të PDIU-së.
Ulsi Manja, Vasilika Hysi dhe Luan Rama janë tre emrat e mazhorancës që u votuan sot në Kuvend, duke u zgjedhur kështu si anëtarë të komisionit ad hoc.
Anëtari i katërt, Shpëtim Idrizi nuk arriti të marrë votat e nevojshme. Idrizi mori vetëm 23 vota pro, ndërsa 50 të tjera ishin abstenim.
Më i votuari ishte Luan Rama i LSI me 85 vota pro dhe 1 abstenim. Ulsi Manja i PS mori 78 vota pro, 1 kundër dhe 1 abstenim, ndërsa për Vasilika Hysin gjithashtu e PS, shkuan 80 vota pro, 1 kundër dhe 1 abstenim.
Pavarësisht këtij votimi në Kuvend, komisioni ad hoc nuk mund të jetë funksional, pasi mungojnë tre emrat e opozitës, e cila ka bojkotuar Kuvendin prej 53 ditësh.
Të premten, Operacioni Ndërkombëtar i Monitorimit(ONM) bëri të ditur përfundimin e vlerësimit të kandidaturave për institucionet që do të kryejnë procesin e rivlerësimit të gjyqtarëve dhe prokurorëve shqiptarë. Nga 84 kandidaturat e përzgjedhura nga Avokati i Popullit që përmbushnin kriteret formale, ONM dha vlerësim pozitiv për 67 prej tyre. /tesheshi.com/
