Edi Rama nuk është ende i qetë që i ka 74 deputetë të sigurtë ditën e shtunë për të zgjedhur Gramoz Ruçin si kryetar Kuvendi, ndaj sot ka ndërmarrë një veprim çoroditës ndaj rivalit Ilir Meta, i cili mësohet se ka katër deputetë të fshehtë brenda grupit socialist dhe mund të shkaktojë telashin e parë për mazhorancën.
Gati e njëjta skemë si në Kosovë po ndodh edhe këtu.
Ditën e nesërme Edi Rama ka thirrur 73 deputetët e Partisë Socialiste në selinë rozë, në një mbledhje ku do të bëhet i ditur plan i mazhorancës për të zgjedhur Gramoz Ruçin kryetar Kuvendi, pa lejuar që saanca të degradojë si një protestë-bllokadë nga ana e opozitës, e cila mësohet se ka hartuar edhe ajo një plan të sajin spektakolar.
Kemi të bëjmë me tre plane paralele: një nga Rama, një nga Basha, dhe një nga LSI se si do të sillen në seancën e së shtunës ku shpallet dhe nis nga puna parlamenti i ri i 25 qershorit.
Sali Berisha përfundimisht ka refuzuar të drejtojë seancën konstituitive si deputeti më i vjetër dhe të njëjtën gjë kanë bërë Tritan Shehu dhe Halim Kosova.
Do të jetë nga PS-ja kryesuesi i seancës dhe është pikërisht Besnik Baraj, një pedagog i biologjisë i zgjedhur në qarkun e Tiranës. Por mësohet se opozita e ka bërë plan që të përfitojë pikërisht nga butësia dhe paeksperienca e Barajt për të përballur një furi tipike të PD-së në seancë për të bllokuar foltoren dhe penguar procedurën e zgjedhjes së kryetarit të ri, pa zbatuar disa kushte që ajo do t’i bëjë të ditur në seancë duke sulmuar Gramoz Ruçin.
Pikërisht këtij skenari i frikësohet Edi Rama, i cili nga ana e tij ka hartuar kundërofensivën që të bëjë të mundur shmangjen e një përplasjeje të madhe.
Ka gjasa, që si në Kosovë, parlamenti të shtyjë punimet deri të hënën nëse do të ketë bllokadë, ose ta zgjedhë kryetarin e ri në orët e mesnatës.
Në seancë, akti e parë është verifikimi i mandateve dhe zgjedhja e sekretarisë së Kuvendit, procedurë që shmang fjalimet dhe deklaratat politike.
Kjo sepse përpara verifikimit të mandateve, deputetët nuk mund të quhen ligjërisht të tillë.
Ndërkaq, sot, për të çoroditur rivalin e LSI-së, Edi Rama ka bërë një karshillëk politik, duke vizituar impjantin turistik në pronësi të deputetit të LSI-së Agron Çela në Velipojë, ku kryeministri prej dy ditësh ka mbledhur qeverinë.
Takimi, edhe pse në dukje kortezial është një demonstrim që Çela mund të jetë një mbështetës i mundshëm i qeverisë.
Dhe në fakt, deputeti i LSI-së në Shkodër prej kohësh ka pasur marrëdhënie të mira me Ramën, madje në një periudhë të gjatë kohe nuk ka folur me shefin e tij pikërisht për këtë fakt.
Ndërkohë, ditën e shtunë pritet që përpara Kuvendit dy organizata të përndjekurisht të zhvillojnë një protestë para Kuvendit, ku ka gjasa të instalojnë edhe një çadër për grevë urie si reagim ndaj zgjedhjes së Gramoz Ruçit si kryetar Kuvendi.
Ndërkaq, policia pritet të marrë masa që të ndalojë një demonstrim agresiv, por këtu ka një kleçkë. Dritan Demiraj, njeriu i Bashës që është ministër i Brendshëm ende në detyrë, e ka urdhëruar Drejtorin të Policisë, Haki Çako që të mos ndërmarrë asnjë masë repressive.
Basha do ta përdorë kartën Demiraj deri në momentin e fundit për t’i dhënë atij një mundësi: ose për të ndaluar instalimin e Ruçit, ose për të shtyrë policnë drejt një incidenti fatal që do ta njollosnin zgjedhjen e numrit dy të PS-së në krye të Kuvendit.
Megjithatë, gjithçka siç mësohet po ndërmerret në heshtje dhe në fshehtësi të plotë. Po hartohen skenare të padukshme, të ngjashme si ato që ndodhën në Kosovë e që sollën përmbysjen e situatës politike.
Seanca e të shtunës fillon në orën 10.00 paradite dhe të vetmen risi ka që Lulzim Basha rikthehet pas katër vjet mungese në Kuvend dhe kësaj radhe si lider i opozitës. Situatë që do të provojë live cila do të jetë pesha e Bashës dhe ajo e Sali Berishës brenda Kuvendit. /tesheshi.com/
