Reforma Zgjedhore konsiderohet nga opozita si emergjente, çka do të thotë që me nisjen e legjislaturës së re, do të kërkohet të nisë puna për realizimin e saj.
Burime nga PD shprehen për tesheshi.com se kreu demokrat do të kontaktojë me të gjithë kryetarët e partive të opozitës që sot janë pjesë e Kuvendit, për të vijuar më pas me një tryezë të të gjitha partive opozitare joparlamentare, në lidhje me këtë reform.
Madje diskutimi ka nisur me kreun republikan Fatmir Mediu, me të cilin është diskutuar mbi çështje konkrete që kanë lidhje me reformën zgjedhore.
Burimet shprehen se në takimin Basha-Mediu është diskutuar madje edhe për ekspertët që do të angazhohen për hartimin e propozimeve, të cilat më pas do të përdoren nga deputetët demokratë si një udhërrëfyes.
Opozita do të insistojë që deri në fund të vitit, Kuvendi të hedhë hapa konkretë në nisjen e punës për reformën zgjedhore, në mënyrë që gjithçka të jetë gati përpara zgjedhjeve vendore të 2019-ës.
“Nuk mundet më të vazhdohet me zgjidhje të minutës së fundit. Duhet një Kod Zgjedhor që të garantojë standarde zgjedhore, përfshi këtu votim dhe numërim elektronik, të cilat do të parashtrohen nga opozita në muajt e parë të Kuvendit të ri”, shprehen burime nga PD.
Sipas tyre, grupi i ekspertëve të opozitës do të përfshijë edhe pjesëtarë të shoqërisë civile, si dhe do të ketë asistencën e ekspertëve ndërkombëtarë, europianë dhe ameriikanë, në mënyrë që çdo proçes tjetër zgjedhor të mos karakterizohet nga fenomenet që u vunë re në 25 qershor apo në zgjedhjet e mëparshme.
Referuar kësaj, duket se PD dhe aleatët e saj në Kuvend, do të kushtëzojnë çdo qëndrim me mazhorancën me nisjen e punës për reformën zgjedhore dhe seriozitetin që do të tregohet për të implementuar në ligj propozimet e çertifikuara edhe nga ekspertët ndërkombëtarë zgjedhorë.
Paralelisht me këtë, burimet konfirmojnë se do të insistohet për një reformë të plotë kushtetuese, e cila jo pak herë është përmendur nga Lulzim Basha gjatë fushatës për zgjedhjet parlamentare të 25 qershorit. /tesheshi.com/
