Kuvendi i ri, dalë nga zgjedhjet e 25 qershorit dhe që do të nisë punimet në shtator, ka në përbërjen e tij mjaft emra të rinj, madje edhe studentë, që ende nuk janë diplomuar.
Kështu referuar deklarimeve të vetë deputetëve, Kejdi Mehmetaj dhe Floida Kërpaçi, që përfaqësojnë LSI, Reme Lala që përfaqëson PDIU dhe Anduel Xhindi i PS-së, rezultojnë të jenë studentë.
Mehmetaj vazhdon studimet për Inxhinieri, Kërpaçi për mjekësi dega Farmaci, Lala vazhdon studimet për degën Financë, ndërsa Xhindi vijon studimet e nisura nga 2006 në fakultetin Ekonomik.
Ndërkohë, që ligjvënësit me më shumë mandate në Parlamentin e ri janë Sali Berisha, Gramoz Ruçi dhe Pandeli Majko. Të tre ligjëvënsit, dy nga PS dhe një nga PD, kanë qenë prezent në pothuajse çdo legjislaturë, pavarësisht funksionit të tyre.
Por jo më pak eksperiencë kanë Erjon Braçe, Fatmir Xhafaj, Edmond Spaho apo Edi Paloka, që kanë së paku nga 4 mandate rradhazi në Kuvendin e Shqipërisë.
Kuvendi i ri do të mblidhet në javën e 3-të të shtatorit, ndërsa si rregulll seanca hapet nga deputeti më i vjetër, që rezulton të jetë Sali Berisha. Por edhe në 2013, ish-Kryeministrit i takonte drejtimi i seancës së konstituimit të Kuvendit, por në atë kohë e refuzoi, çka një vendim të tillë mund t’a përsërisë edhe në seancën e parë të legjislaturës së re.
Shumë nga politikanët me eksperiencë, qoftë në rradhët e PS ashtu edhe të PD-së nuk u rikandiduan në zgjedhjet e 25 qershorit duke sjellë një ndryshim në jetën politike.
Arta Dade, Valentina Leskaj, Jozefina Topalli, Majlinda Bregu, Namik Dokle, Arben Imami, Genc Ruli, Astrit Patozi, Ridvan Bode, janë disa nga emrat që mbizotëruan në politikë për më shumë se 20 vjet, por të paktën për legjislaturën e re do të mbeten ish-deputetë. /tesheshi.com/
