Mbledhja e Kryesisë së Kuvendit të Kosovës e parashikuar të mbahej këtë të hënë ka dështuar pasi mungonin disa anëtarët e saj.
Në mbledhje munguan anëtarët Xhavit Haliti nga PDK, Aida Dërguti nga VV dhe dy anëtarë nga minoritetet, ndërsa i pranishëm ishte vetëm kryetari Kadri Veseli dhe anëtari nga LDK-ja Sabri Hamiti.
Dështimi i kësaj mbledhjeje ka bërë që të reagojë ashpër shefi i grupit parlamentar të AAK-së, Pal Lekaj i cili kërkon që urgjentisht të shpallen zgjedhjet e parakohshme.
Ai thotë se qeveria e cila në Kuvend i ka mbi 80 numra, nuk ka kuorum për asgjë, nuk ka numra për marrëveshje e për ligje të rëndësishme për Kosovën, atëherë është e braktisur nga të gjithë e edhe nga vetë vetja.
“Edhe sot me mosmbajtjen e kryesisë së Kuvendit si pasojë e mungesës së kuorumit është tregues se vendi është në bllokadën me të keqe që nga pas lufta.
Qeveria është e paaftë të procedojë dhe të furnizojë me projektligje Kuvendin e Kosovës, nuk ka asnjë vizion se si të ecet përpara, ka mbetur në vendnumëro dhe është e interesuar vetëm që të ruaj pushtetin e saj me çdo çmim. Nën qeverisjen e këtij koalicioni mund të flasim vetëm për rritjen e papunësisë, mos krijimin e Ushtrisë, mbetjen pa liberalizim, dështimet në anëtarësim në organizata ndërkombëtare e të tjera mos zhvillime. Prandaj të shpallën zgjedhjet e të shpëtohet Kosova!”, ka shkruar Lekaj në Facebook.
Mbledhja e Kryesisë u shty për një ditë tjetër të pacaktuar. /tesheshi.com/
