Kryeparlamentarja Lindita Nikolla nisi lëvizjet e para në lidhje me politikanin e profilit të lartë me iniciale I. M., referuar nga Autoriteti i Dosjeve, për të cilin thuhet se ka qenë bashkëpunëtor i Sigurimit të Shtetit. Gjuha shkon te Ilir Meta, i cili sapo ka startuar një cikël të ri politik opozitar, me LSI-në shndërruar në Parti e Lirisë.
“Rasti është tronditës dhe Kuvendi duhet të reagojë patjetër. Prandaj kam thërritur kryetarët e grupeve parlamentare. Dua të falënderoj Autoritetin e Dosjeve për reagimin e drejtë dhe kurajon për adresimin e këtij rasti. Në respekt të ligjit nuk mund të flas më shumë në këtë fazë”, tha Nikolla, pasi jua shfaqi rastin krerëve të grupeve parlamentare.
Të parët që reaguan qenë Mediu dhe Doda, nga e djathta, të cilët, edhe pse në një front opozitar me Metën, nuk e gëlltisin dot që ai të ketë qenë një ish-spiun ndërkohë që është strumbullar politik në gati tre dekada.
“Autoriteti ka paraqitur një dosje për kërkesë për ndryshime ligjore. Do të diskutojmë me kolegët e grupit se kush është qasja politike dhe ligjore. Do të shpresoja që të mos jetë kazus politik. Nuk jam njohur me emrat e veçantë, por ligjet nuk bëhen për individët, por çështje të caktuara. Kuvendi duhet të mbajë një qëndrim të qartë”, tha Mediu.
“Nuk mund të vazhdojmë më me iniciale, duhet të dalin me emra dhe kryetarja e Kuvendit të kërkojë pastërtinë e figurës për të 140 deputetët”, tha Mesila Doda. /tesheshi.com/
