Seanca e stërzgjatur konstituitive e Kuvendit të Maqedonisë u mbyll vonë në mbrëmje pa mundur të zgjedhë kreun, si pasojë e mungesës së kuorumit të nevojshëm, që duhet të ishte 61 deputetë.
Kujtojmë se LSDM së bashku me BDI-në e kanë propozuar Talat Xhaferin e kësaj të fundit për kryetar të Kuvendit. Për LSDM-në, e rëndësishme është që njeriu i parë i Kuvendit të ketë përvojë, ta njohë atë dhe demokracinë parlamentare.
Ndërkaq, deputeti i VMRO-DPMNE-së, Ilija Dimovski, theksoi se kryetari i ri duhet ta refuzojë Deklaratën e Përbashkët të partive shqiptare, sepse siç tha ai “ajo është përgatitur nga Tirana zyrtare dhe synon të dëmtojë karakterin unitar, sovranitetin dhe pavarësinë e shtetit”. Ai shtoi se nevojitet debat rreth përbërjes së komisionit, sepse ky komision do të propozojë kryetarin e ri të Kuvendit i cili është një nga funksionet më të rëndësishme të shtetit.
Nga ana tjetër, Lëvizja BESA nuk do ta përkrah kandidaturën e Talat Xhaferit. Deputeti i kësaj partie, Afrim Gashi, tha se Talat Xhaferi nuk është njeri i denjë për postin e kryeparlamentarit. /tesheshi.com/
