Në Maqedoni shënohet historia: me 69 vota “pro”, kuvendi ka arritur të ratifikoj marrëveshjen e emrit me Greqinë, me ç’rast emri i ri i shtetit do jetë “Republika e Maqedonisë së Veriut”.
Në seancën plenare sot munguan deputetët e opozitës VMRO-DPMNE-së të cilët paralajmëruan bojkot të këtij procesi.
Pasi që kjo marrëveshje kaloi në Kuvend, propozim ligji për ratifikimin e marrëveshjes i dërgohet presidentit për nënshkrim.
Por Gjorgje Ivanov, shumë ditë më parë ka paralajmëruar se nuk do të legalizojë një marrëveshje të tillë. Në këtë situatë do të përsëritet rasti i njëjtë sikur me ligjin për përdorimin e gjuhëve. Kuvendi do të duhet të miratojë ligjin edhe një herë dhe më pas Ivanov do të jetë i obliguar ta nënshkruajë, por nuk dihet se si do të veprohet nëse ai nuk e bën këtë as për herë të dytë.
Vlen të përmendet fakti që sot, për habi, para Kuvendit të Maqedonisë nuk kishte protestues që ta kundërshtojnë votimin e marrëveshjes me shtetin fqinj si ditët e kaluara. /tesheshi.com/
