Nga Blendi Gashi
Siç dhe pritej, Demarkacioni me Malin e Zi ka ngjallur debat të nxehtë në Kuvendin e Kosovës, ku ka rënë në sy riaktivizimi i fuqishëm opozitar i Vetëvendosje-s, por pa gaz lotsjellës.
Kryekuvendari Kadri Veseli paralajmëroi ligjvënësit se shumë shpejt çështja e Demarkacionit do të vijë aty për t’u rartifikuar.
Sipas tij, kuvendi dhe deputetët deri më tani nuk kanë marrë asnjë material në lidhje me Demarkacionin sepse qeveria nuk ka arritur ta bëjë këtë.
Veseli tha se sapo ta marrin materialin do të organizohet debati jo vetëm me ekspertë por edhe me shoqërinë civile.
Ai kërkoi nga opozita ta lejojë debatin dhe më pas të vendoset për çështjen në fjalë, pasi tha se është e padrejtë të pengohen të zgjedhurit e popullit për ta thënë mendimin e tyre.
Deputeti Bulliqi kërkon tryezë për Demarkacionin
Deputeti i LDK-së, Shpejtim Bulliqi i cili ka qenë më i zëshmi nga pozita për Demarkacionin, kërkoi nga kryeparlamentari Veseli që të organizojë një takim në mes komisionit shtetëror për Demarkacion dhe ekspertëve.
Sipas tij, me këtë takim do të analizohet të gjitha faktet e deritanishme dhe të gjendet një zgjidhje për këtë çështje të mprehtë.
Veseli i gatshëm ta organizojë tryezën
Krykuevndari Veseli iu përgjigj deputetit Bulliqi duke i thënë se është i gatshëm ta organizojë një tryezë, vetëmse për një gjë të tillë duhet bërë kërkesë zyrtare.
“Besoj që ata janë të gashtëm që të futemi në një tryezë të përbashkët para se të vie në Kuvendin e Kosovës. Ajo çfarë do të ishte më kryesore, askush nuk po e fillon iniciativën dhe unë si kryetar do ta filloja nëse me vjen kërkesa zyrtare”, ka thënë Veseli.
VV paralajmëron trazira
Ndërsa pozita parlajmëron ratifikimin e Demarkacionit, Lëvizja Vetëvendosje kërkoi që qeveria të mos provokojë pa e shqyrtuar marrëveshjen në fjalë.
Visar Ymeri, kryetar i Vetëvendosje-s, njëherit deputet, tha se marrëveshja për Demarkacion është imponim që Kosova të humbë territor.
Sipas tij, marrëveshja për kufirin me Malin e Zi mund të ratifikohet në kuvend vetëm nëse ajo rishikohet dhe fillohet nga pika zero.
“Nuk ka paqartësi, por nuk ka edhe mundësi që marrëveshja të ratifikohet në mënyrë demokratike. Këtu ka shumë deputet që ia duan të mirën Kosovën dhe nuk pranojnë të bëhen vegla të këtij pushteti. Këtu marrëveshja për demarkacion mund të ratifikohet vetëm nëse jepen poste të ndryshme. Kjo marrëveshje nuk bën të ratifikohet. Marrëveshja duhet rishikuar dhe procesi duhet të fillojë nga zero. Marrëveshja është imponim për të na marr territor. Si imponim ne duhet të përballemi me të”, deklaroi Ymeri.
Edhe deputetja e VV-së, Donika Kadaj-Bujupi tha se tashmë opozita ka dëshmuar në disa raste që kjo marrëveshje është e gabuar dhe nuk duhet kaluar, duke paralajmëruar trazira të reja në kuvend.
“Ne kërkojmë nga qeveria që mos të provokoj duke e sjell demarkacionin pa e shqyrtuar, është dëshmuar tashmë pothuajse me të gjitha provat e paraqitura tash e rreth nëntë muaj që shënimi i kësaj vije kufitare është i gabuar. Prandaj çfarëdo përpjekje për ta legjitimuar janë humbje të tillë, ne me të gjitha forcat dhe me veprimet tona do të jemi kundër në mënyrë që ta parandalojmë. Nëse do të vjen të hënën në Kuvend do të ketë trazira të reja dhe probleme”, ka thënë Kadaj-Bujupi, duke shtuar se ai kufi nuk do të njihet kurrë as nga qytetarët e Kosovës as nga deputetët e Lëvizjes Vetëvendosje.
Deputetja e LDK-së, Vjosa Osmani theksoi pak para nisjes së seancës plenare theksoi se qeveria ka një vit që po e mban fshehtë marrëveshjen për Demarkacion dhe se nuk do të votoj atë pa e parë marrëveshjen.
Ndryshe, më 11 korrik pritet të mbahet seanca e fundit e sesionit pranveror ku pritet të përcaktohet edhe fati i Demarkacionit, pra të dërgohet për ratifikim në kuvend. /tesheshi.com/
