Kuvendi i Kosovës vazhdon të jetë në një krizë të thellë por jo për shkak të opozitës dhe gazit lotsjellës por për shkak të mungesës së kuorumit.
Në sesionin e pasdites të seancës së sotme kanë mbetur në sallë vetëm 57 deputetë. Me këtë rast kryesuesi i seancës, Sabri Hamiti, deklaroi se nuk mund të marrin asnjë vendim me këtë numër.
“ Nuk mund të marrim vendime me 57 deputetë, andaj unë i lus shefat e grupeve parlamentare të artikulohen, a duan dhe kur duan ta vazhdojnë këtë mbledhje, a i sjellin 61 deputetë këtu”, tha Hamiti.
Mospjesëmarrja e deputetëve në seancë ka bërë që të reagojnë shefat e grupeve parlametnare të dy partive në koalicion PDK-së e LDK-së.
Adem Grabovci shef i GP të PDK-së tha se i vije keq për kolegët deputetë që nuk janë të vetëdijshëm për përgjegjësinë që kanë.
“Kemi tre javë që nuk kemi pas seancës, e kemi obligim dhe përgjegjësi të marrim pjesë e të mundësojmë funksionim normal të Parlamentit të Kosovës. Duhet të bëjmë një zgjidhje. Të gjejmë një formë që deputetët që nuk marrin pjesë në votim, mos të kenë të drejtë të marrin mëditjet. Mendoj ta lëmë për javën e ardhshme votimin”, tha Grabovci.
Edhe shefi i GP të LDK-së Ismet Beqiri tha se mospjesëmarrja e deputetëve në sallë është e pa kuptueshme.
“Është e pakuptueshme, nuk ka rëndësi se çka shkruan në dokumente, se ka pavarësi me qenë apo jo këtu, por mospjesëmarrja është papërgjegjësi totale. Mundemi që javën e ardhshme t’i votojmë këto pika që kanë mbetur”, tha Beqiri.
Në mungesë kuorumi u vendos që pikat e mbetura të diskutohen në seancën e ardhshme.
/tesheshi.com/
