Kryeparlamentari, Kadri Veseli, ka bërë të ditur se legjislativi i vendit do të mblidhet më 28 prill në të cilën seancë do të shqyrtohen disa projektligje dhe raporte. Kjo do të jetë mbledhja e parë e Kuvendit, pas betimit të presidentit të ri të Kosovës, Hashim Thaçi.
Veseli ka thënë se janë zhvilluar takime me përfaqësues të opozitës, por jo në nivel liderësh, për t’u kthyer në punët e Parlamentit. Ai këtu nuk e ka përjashtuar as Vetëvendosjen. Ai ka thënë se oferta për liderët opozitarë vazhdon të jetë e hapur dhe do të insistojë të zhvillojë takim me ta.
Veseli nuk ka dashur të flasë shumë në rolin e kryetarit të ardhshëm te PDK, por ka thënë se zgjedhje nuk mund të mbahen çdo muaj.
Lidhur me mbajtjen e zgjedhjeve serbe në Kosovë, Veseli tha se Kosova është shtet i pavarur dhe do të kërkojë nga Serbia që në mënyrë reciproke të respektohet legjitimiteti. /tesheshi.com/
