Seanca e sotme e Kuvendit të Kosovës po mbahet për të inicuar dënimin e gjenocidit serb dhe formimin e komisionit shtetëror për një Tribunal për gjykimin e krimeve të luftës.
E zëshme në këtë seancë ka qenë deputetja nga radhët e PDK-së, Flora Brovina, e cila ka sjellë dëshmi përmes fotografive se si një grua përdhunohet nga ushtarët serbë, ndërsa familjarët e saj qëndrojnë pak metra larg, disa të gjallë e disa të vdekur.
Fotografia tronditëse nuk është publikuar asnjëherë më parë, e megjithatë ka qenë në duart e zonjës Brovina për shumë kohë. Fotografia ishte siguruar pasi njërit nga ushtarëve i kishte humbur aparati fotografik. Megjithatë, në aparat kishte pamje të mjaftueshme për të identifikuar autorin e krimit.
Është mjaft tronditëse edhe deklarata e zonjës Brovina, e cila pohon se fotografia në fjalë i është paraqitur UNMIK-ut dhe EULEX-it, por se asnjëra palë nuk ka ndjekur rastin, ndonëse dihet identiteti i keqbërësve.
Ajo ka refuzuar të japë më shumë detaje të rastit, duke thënë se pamja e fotografisë ofron dëshmi të mjaftueshme për t’i dërguar në bankën e të akuzuarve ata që kryen krime të tilla.
Zonja Flora Brovina ka vuajtur disa vite burgim në Serbi për shkak të aktiviteteve të saj politike të para luftës.
P.S. Për arsye etike, tesheshi.com vendosi të mos ja ofrojë lexuesit pamjen e fotos së znj. Brovina. /tesheshi.com/
