Akuzat ndaj kryeministrit Edi Rama se po mbështet bandit jo vetëm në Elbasan, por në të gjithë vendin, ishin në qendër të fjalimeve të deputetëve të opozitës.
Pas Lulzim Bashës dhe Sali Berishës, akuzat u artikuluan edhe nga kreu i deputetëve demokratë, Edmond Spaho, sipas të cilit kryeministri Rama nuk e vërteton dot se qeveria e tij është legjitime, dhe nuk ka ardhur nga blerja e votave më 25 qershor.
“Duhet të tregoni se qeveria juaj është legjitime. Vetëm ditën e zgjedhjeve kanë dalë mbi 10 milionë euro në qarkullim. Ku kanë shkuar këto para. Vërtetoni që nuk janë përdorur për zgjedhjet, dhe ne do t’ju besojmë. Por me zgjedhjet e 25 qershorit 2017 u bë masakër.
Janë bandat që ju ndihmuan të vinit në pushtet dhe tani ju nuk guxoni t’i luftoni. Bandat e Elbasanit kanë mbështetje politike, mbështetjen e kryetarit të bashkisë. Dhe qëllimi ynë është që të bëhet reforma në drejtësi, dhe të mos lejohet më blerja e votës.
Por ju shtyni reformën zgjedhore, e në fund thoni ‘s’ka kohë’. Ju jeni kryetar i një qeverie ilegjitime, që ka ardhur me votë të vjedhur. Jeni peng i bandave, të atyre që të sollën në pushtet, prandaj nuk guxon t’i sulmosh dhe t’i tregosh vendin”, u shpreh Spaho. /tesheshi.com/
