Kuvendi u mblodh në seancë plenare ditën e sotme, ndërsa ajo u drejtua nga deputeti socialist Besnik Bare.
Vendimi mësohet se është marrë nga administrata e Kuvendit, pasi dy deputetë Sali Berisha dhe Tritan Shehu, refuzuan të drejtojnë seancën.
Seanca e parë drejtohet nga deputetët më të vjetër në moshë,por duket se ka pasur një anashkalim që mund të konsiderohet edhe si shkelje.
Kjo për shkak se më i vjetri në moshë pas Berishës dhe Shehut është Petrit Vasili, deputeti i LSI-së.
Nuk dihet pse është anashkaluar proçedura në rastin e Vasilit dhe pse u zgjodh Bare, i cili renditet i 4-ti për nga mosha në parlamentin e ri.
Dyshimi i parë ka të bëjë me faktin se mund të zgjateshin proçedurat e seancës konstituive dhe me zgjedhjen e Bares si drejtues i seancës konstituive u shmang një debat i stërzgjatur proçedurial.
Gjithsesi mund të jetë edhe një gabim teknik i administratës së Kuvendit, ose një tërheqje e Vasilit në momentet e fundit, megjithëse nga opozita mohohet një refuzim i tillë edhe nga deputeti i LSI-së, siç ndodhi në rastin e dy deputetëve demokratë. /tesheshi.com/
