Kryeministri Edi Rama ka pranuar ekzistencën e bandave kriminale në Elbasan, gjatë fjalës së tij në Parlament, në orët e vona të mbrëmjes së të enjtes.
Duke ju përgjigjur akuzave të opozitës në Kuvend për lidhjet me krimin dhe bandit, Rama sqaroi se në Elbasan është në proces operacioni që nuk mbaron pa u vënë para përgjegjësisë të gjithë ata që janë të përfshirë, qofshin forca të policisë dhe qofshin forca të organizatave.
“Jam dakord që ai qytet duhet çliruar. Por jo të gjitha do të bëhen publike sepse është një operacion në vazhdim”, tha Rama.
Ai përmendi gjithashtu edhe operacionin e policisë “Vjeshtë 2017” që po zhvillohet në të gjithë vendin, për sekuestrimin e makinave luksoze dhe pasurive kriminale të pajustifikuara.
“Beteja me krimin ka hyrë në një fazë të re. E kemi paralajmëruar dhe po e implementojmë. Jo vetëm atyre të fortëve me status të veçantë nuk do t’ju ndahemi, le të jenë kush të jenë, le të kenë lidhje me kë të kenë. Nëse janë pjesë e rrjeteve kriminale ne do na kenë këmba këmbës deri në vrimën e fundit. Por përveç atyre, vetëm sot janë miliona euro makina të shtrenjta të sekuestruar”, u shpreh kryeministri Edi Rama.
Pas kryeministrit, ka reaguar kryedemokrati Lulzim Basha, i cili tha se Rama ka frikë të përmendë togfjalëshin “organizata kriminale”, por e cilëson vetëm organizata.
“Pse ke frikë ta thuash togëfjalëshin bandë kriminale? Ke frikë nga ndonjë këtu në Kuvend? Jap o ta them unë, dhe ti e di që nuk flas kot, sot po ta them unë, nesër do të ta thonë partnerët tanë ndërkombëtarë se problem që ka sot Shqipëria është droga, krimi dhe bandit”, tha Basha.
Replikat për vetingun
Rama dhe Basha replikuan mes tyre edhe për organikën e tre institucioneve të vetingut dhe reformën në administratën publike.
Gjatë fjalës së tij, Kryeministri Rama tha se Shqipëria ka numrin më të madh të drejtorëve dhe shefave, duke paralajmëruar kështu shkurtime në vendet e punës të administratës.
“Jemi vendi me numrin më të madh të drejtorëve, shefave, sekretareve, pastruesve dhe rojeve në Europë. Shoqërira, operatorë të posaçëm, shto ujë e shto miell me qëllim për t’i gjetur punë njerëzve të partisë. Ne nuk mund të pranojmë që në administratat normale në Europë e rajon raporti i nëpunësve që paguhen për të realizuar misionin është 3 me 1, ndërsa ne e kemi 1 me 1, se janë të partisë e të tepsive”, deklaroi Rama.
Nga ana tjetër, kryeopozitari Basha i përmendi Kryeministrit Rama kohën kur drejtonte Bashkinë e Tiranës në të cilën kishte numër të lartë punonjësish personal.
“Kur ishe në Bashki kishe 8 maxhordomë me bluza të bardha. 11 vjet në Bashki, 8 maxhordomë. E jotja s’është qeveri e vogël. Kjo është qeveria më e rëndë e 27 viteve. Ty të duhen dy garuzhdet, Damiani me Arbenin, edhe pecetët që të fshish buzët dhe tepsia është e jotja. 25 inspektoriate krijove. Nuk kanë firmën e PD, as të Sali Berishës. Kanë firmën tënde, ti je Kryeministri. Hape me qindra vende të panevojshme pune duke filluar nga Kryeministria. Ti pra po na jep këtu leksione për reformën dhe tani ke vetëm një qëllim, tepsinë për vete. Ata maxhordomët e tu unë i hoqa nga puna, sigurisht nuk më erdhi mirë se ishin familjarë dhe ata”, tha Lulzim Basha. /tesheshi.com/
