Nga Blendi Gashi
Dalja në skenë e Haradinajt të arrestuar në Francë, e ka lënë paksa në të harruar çështjen e murit serb në veri. Por përë mur, ka një rezulotë të 29 dhjetorit, përmes së cilës parashihet rrënimi gjatë këtij muaji.
Por deri më tani shenjat janë që qeveria e drejtuar nga Isa Mustafa nuk do mundet ta bëjë një gjë të tillë, pavarësisht deklarimeve përbetuese të Thaçit, Veselit e Tahirit. Ndërkohë, mundësinë e rrënimit të murit e kanë përjashtuar drejtuesit serbë të Mitrovicës së Veriut.
E ndërsa ditët po ecin e muri po qëndron në këmbë, partia që inicioi seancën e jashtëzakonshme për çështjen në fjalë, AAK-ja ka paralajmëruar se në rast se nuk zbatohet rezulota e Kuvendit, do të kërkojë shkarkimin e kryeministrit Mustafa dhe gjithë qeverisë.
Një gjë të tillë e ka bërë të ditur ditë më parë, shefi i grupit parlamentar të kësaj partie, Pal Lekaj, i cili tha se rezoluta e obligon ekzekutivin që deri në fund të këtij muaji të heqë murin e ngritur në veri.
“Rezoluta e miratuar nga Kuvendi e thotë që muri dhe shkallët (njëra nga pikat) duhet të rrëzohen dhe ura të përmbajë të gjitha elementet që i kishte para vitit 1999. Jemi duke e përcjellë situatën në këtë drejtim dhe do të ndërmarrin çdo gjë konform zhvillimeve. Presim që qeveria të përmbushë pikat e rezolutës për rastin e murit në veri të Mitrovicës”, tha Lekaj për tesheshi. com.
Ai më tej informon se për këtë çështje janë në kontakt edhe me dy partitë opozitare Vetëvendosje-n dhe NISMA-n.
“Sikur edhe për shumë çështje të tjera që janë preokupim për Kosovën, komunikojmë me dy partitë tjjera opozitare. Kjo nënkupton që edhe për çështjen e murit dhe rezolutës të nxjerrë për të jemi në komunikim. Nëse nuk rrëzohet muri gjatë këtij muaji siç e parasheh rezulta e miratuar nga Kuvendi, ne si Aleancë dhe si iniciues të kësaj rezolute së bashku me dy partitë tjera opozitare do të kërkojmë shkarkimin e kryeministrit dhe gjithë qeverisë, sepse njëherë e përgjithmonë këta duhet të respektojnë parlamentin e Kosovës, si organi më i lartë i shtetit dhe të marrin obligime nga shumica e deputetëve”.
Shkodran Hoti, zyrtar për media në Vetëvendosje thotë se rezoluta e nxjerrë parasheh që muri ndarës në Mitrovicë të rrënohet këtë muaj, andaj janë në pritje se çdo të ndodh në ditët në vijim.
“Institucionet do të duhej të ndërmerrnin veprime sa më shpejtë sa i përket murit, dhe nëse kjo nuk ndodh, kemi të bëjmë me situatë të re, e rrjedhimisht edhe veprime të reja, për të cilat s’mund të flasim tani. Megjithatë, rrënimi i murit nuk e shpëton Kosovën nga kthetrat e rrezikshme të dialogut pa parime e pa kushte me Serbinë. Pra, para se gjithash e mbi të gjitha, për Lëvizjen Vetëvendosje mbetet domosdoshmëri ndërprerja e dialogut, proces ky që po e vë në pikëpyetje shtetësinë”, tha Hoti për tesheshi. com.
Gecaj: Qeveria rrëzohet veç nëse vendosin LDK e PDK
Paralajmërimeve për inicimin e mocionit të shkarkimit të qeverisë nuk i frikësohen pushtetarët.
Zv.ministri Bajram Gecaj, njëherit këshilltar i kryeministrit Mustafa, thotë se opozita në një mënyrë ose tjetër ka inicuar shkarkimin e kësaj qeverie që nga dita e parë e mandatit të saj.
“Ata do të duhej ta kishin kuptuar tanimë se kjo qeveri mund të bjerë vetëm një gjë e tillë inicohet nga LDK ose PDK, apo me marrëveshjen e këtyre të dyjave”, ka thënë Gecaj për tesheshi. com. /tesheshi.com/
