Presidenti i zgjedhur i SHBA-së, Donald Trump tha të martën se vendet e NATO-s duhet të shpenzojnë pesë për qind të prodhimit të brendshëm bruto (PBB) për mbrojtje, krahasuar me objektivin aktual prej dy për qind.
“Të gjithë mund ta përballojnë atë, por duhet të jetë në pesë për qind, jo dy për qind,” tha ai gjatë një konference shtypi në resortin e tij Mar-a-Lago në Florida.
“Unë jam ai që i kam bërë të paguajnë dy për qind”, vazhdoi ai.
Trump, i cili kthehet në Shtëpinë e Bardhë më 20 janar, ka qenë prej kohësh një kritik i NATO-s, duke argumentuar se shumë anëtarë evropianë nuk duan të paguajnë për mbrojtjen e tyre dhe në vend të kësaj mbështeten te taksapaguesit amerikanë.
Në tubimin parazgjedhor të vitit të kaluar, ai tha se do të “inkurajojë” Rusinë “të bëjë çfarë të dojë” ndaj vendeve të NATO-s që nuk shpenzojnë mjaftueshëm për mbrojtjen. /tesheshi.com/
