Në një intervistë nga SHBA, kryeministri Rama ka komentuar “Po”-në gjermane për hapjen e negociatave, shoqëruar me nga një mal me kushte, të cilat të japin përshtypjen e një “Jo”-je në fund.
Por sipas Ramës, kushtet janë diçka pozitive.
“Së pari është qeveria gjermane që e ka ndërmarrë nga Bundestagu një dritë jeshile për të shkuar në Këshillin Euroian me një ‘Po’. Ky është një proces aspak i thjeshtë. Është gjëja më normale të mësohemi se duke çelur negociatat do na duhet të përmbushim qindra kushte. Janë kushte të cilat i bëjnë mirë vendit. Nuk është në interesin e CDU-së që Shqipëria të mbushë kushte. Eshtë në të mirë të vendit tonë që shqiptarët të përmbushin kushtet”, tha shefi i qeverisë shqiptare.
Rama shtoi se i duhet t’i jetë mirënjohës kancelares Merkel, e cila sipas tij ka qenë shtytja kryesore, siç tha, “në thyerjen e kësaj barriere që kishim në Bundestag”.
“Mirëkuptoj edhe ata që kanë votuar kundër”, shtoi Rama, duke theksuar më tej se Shqipëria e meriton hapjen e negociatave. /tesheshi.com/
