Kush i vodhi dhe i plaçkiti 874 kufoma shqiptarësh të vrarë e të masakruar gjatë zhvarrimit në Bajtanicë të Beogradit?!
Bëhet fjalë për mijëra marka, dollarë e xhevahire. E përcjell këtë fakt për tesheshi.com një burim konfidencial, e që konfirmohet dhe nga Bajram Qerkinaj, anëtar i Komisionit Shtetëror të Kosovës për personat e zhdukur.
Burimi thotë se vite më parë, gjatë zhvarrimit të 874 kufomave të shqiptarëve në bazën ushtarake në Batajnicë të Beogradit, ekipi mjekoligjor serb ka gjetur tek viktimat një shumë të madhe parash, mbi 300 mijë DM (marka gjermane), mbi 200 mijë dollarë amerikanë, si dhe 3 kavanozë të mbushur me stoli ari dhe argjendi, si unaza, zinxhirë të ndryshëm të fytit dhe të dorës, dhe një numër shumë të madh të orëve të dorës dhe të xhepit”.
Më pas, ky informacion i është përcjellë zyrtarëve të Komisionit Qeveritar të Kosovës për persona pagjetur, që thonë se personi që jua dha, ka qenë dëshmitar okular i asaj çfarë ka parë gjatë zhvarrimit.
Bajram Qerkinaj nga ky komision, thotë konkretisht se e tëra kjo ngjarje ka dalë më në shesh gjatë një vizite që është bërë varrezës masive të shqiptarëve në Batajnicë të Beogradit në vitin 2014, ku kanë marrë pjesë Komisioni Qeveritar i Kosovës për personat ë zhdukur, një komision ndërkombëtar dhe një komisioni nga Serbia.
“Derisa po vizitonim varrezën, e ku dyshohet se ka ende kufoma të shqiptarëve, një person më është afruar dhe me ka pyetur se a je shqiptar? Dhe dhe më pas më tha se gjatë pranimit të kufomave, a i keni marrë edhe tre kavanozë me stoli ari, orët dhe paratë?”, ka thënë Qerkinaj.
“Mbeta i habitur me këtë dhe thirra në ndihmë dy shqiptarë të tjerë që ishim bashkë dhe iu thashë të dëgjonin se çfarë po thotë ky njeri, i cili i përsëriti të gjitha ato gjëra në prani edhe të bashkëpunëtorëve të mi”, ka shtuar Qerkinaj për mënyrë se si e morrën informacionin.
Sipas tij, personi ka kërkuar nga Komisioni Qeveritar i Kosovës për personat zhdukur që të kërkojmë procesverbalin e pranim-dorëzimit të kufomave në kufirin Serbi-Kosovë në Merdare, si dhe procesverbalin nga Komisioni Mjekoligjor i qeverisë së Serbisë nga vendi i ngjarjes, i cili ka bërë ekzaminimin e trupave të shqiptarëve të zhvarrosur në Batajnicë.
“Komisioni Qeveritar i Kosovës për personat e zhdukur, menjëherë pas kthimit nga Beogradi e kërkoi këtë procesverbal, por as sot e kësaj dite nuk e kemi, nuk na është dhënë”, ka thënë Bajram Qerkinaj.
Në atë kohë, sqaron Qerkinaj, Komisioni për personat e zhdukur ishte në kuadër të UNMIK-ut dhe udhëhiqej nga Hose Pablo Baraibar; që, edhe pse pra nën ombrellë ndërkombëtarësh, procesverbali i pranim-dorëzimi të 874 kufomave nuk ekziston, apo thënë më mirë Komisioni Qeveritar i Kosovës për persona të zhdukur nuk e ka këtë dokument”.
Qerkinaj shton se në një takim që është zhvilluar në Prishtinë, ku kanë qenë edhe përfaqësues ndërkombëtarë dhe të Komisionit të Serbisë, është ngritur problemi i zhdukjes së stolive të arit, argjendit, orëve, si dhe i parave, por përgjigje për këtë nuk u morr asnjëherë, derisa u la tërësisht në heshtje.
“Kemi kërkuar nga ndërkombëtarët dhe Komisioni i Serbisë që të na ofrojë procesverbalet nga vendi i ngjarjes, atë që ka hartuar Komisioni Mjekoligjor serb që ka bërë ekzaminimin e kufomave në Batajnicë, si dhe procesverbalin e pranim-dorëzimit të kufomave në pikën kufitare në Merdare, por një gjë e tillë nuk ka ndodhur”, ka thënë Bajram Qerkinaj.
Por a do zbardhet ndonjëherë kjo çështje? Gjasat janë që jo, por kjo nuk do të thotë se duhet lënë në harresë.
Jo! Sepse para së të flasim për pasurinë e të zhdukurve, janë ende të zhdukurit çështje kryesore, ata me qindra që nuk janë gjendur ende.
Sa për pasurinë e rrëmbyer, derisa u është marrë jeta padrejtësisht dhe çnjerëzisht, pasuria e tyre ka qenë një hiçgjë në ndërgjegjen e vrasësve.
Dhe problemi nuk është tek ata, por tek autoritetet e sotme kosovare, dobësia dhe inferioriteti i tyre përballë serbëve, për të kërkuar atë çfarë u është marrë brutalisht: jetën, nderin, pasurinë! /tesheshi.com/
