Nga Blendi Gashi
Gjykata Speciale për Kosovën në Holandë do të nisë punën gjatë këtij viti. Kjo gjykatë pritet të ngrejë aktakuza ndaj disa krerëve më të lartë të shtetit, emrat e të cilëve janë përmendur nga disa media vendase e të huaja.
Specialja thuhet se do të pastrojë historinë e luftës së UÇK-së nga dyshimet për krime dhe transplantim organesh, pasi këto aktakuza janë duke qëndruar si re të zeza mbi Kosovë, ose si litar rreth fytit për shumë vjet.
Prokurori Special i Task Forcës së BE-së, Clint Williamson, ka thënë se mund të ngrihet vetëm një aktakuzë që përfshin një numër të caktuar individësh. Sipas tij, janë rreth 10 ish-drejtues të UÇK-së ndaj të cilëve pritet të ngrihet aktakuza.
Gazetari Milaim Zeka, ka qenë i pari që ka publikuar emrat e personave të mundshëm, të cilët mund të përballen me Specialen. Ai ka thënë se ka parë me sytë e tij listat në të cilat figurojnë emrat e zyrtarëve të lartë shtetërorë që do të akuzohen si ish-kryeministri Hashim Thaçi, kryekuvendari Kadri Veseli, nënkryetari i Kuvendit Xhavit Haliti, ish-komandanti i UÇK-së dhe deputeti Azem Syla, ish-anëtar i Shtabit të Përgjithshëm të UÇK-së, kreu i AAK-së Ramush Haradinaj, kryetari i NISMA-s Fatmir Limaj, deputeti i VV-së Rexhep Selimi, si dhe ish-komandantë të rangut të lartë, kryesisht nga zona e Drenicës.
Edhe senatori zviceran Dick Marty ka thënë për mediat shqiptare se “mysafirë” të Speciales do të jenë Thaçi, Veseli e Haliti.
Nga ana tjetër, avokatët në vend nuk mendojnë se të gjithë emrat e lartpërmendur do të përballen me Specialen, ndërsa thonë se të dënuarit nuk do të kenë mundësi të ankohen.
Avokati Tomë Gashi ka thënë për tesheshi.com, se për dallim nga Zeka, mendon se Specialja nuk mund te prekë as Haradinajn dhe as Limajn. Sipas tij, statuti i Gjykatës Speciale nuk lejon që Haradinaj të akuzohet edhe një herë, pasi është shpallur i pafajshëm dy herë nga Gjykata e Hagës. E njëjta gjë vlen edhe për Limajn.
I pyetur se a do të kenë një shkallë të tretë ku do të ankoheshin të akuzuarit e Speciales, avokati Gashi thotë se të dënuarit nga kjo Gjykatë nuk do të kenë një shkallë të tretë ku të ankohen për vendimet e gjykatësve ndërkombëtarë, pasi Kosova nuk është anëtare në Këshillin e Evropës.
“Grupi teknik i ekspertëve nga Kosova që kanë punuar me BE-në në Bruksel nuk ka kërkuar fare që të ketë edhe një shkallë të drejtësisë që do të ishte Gjykata ndërkombëtare në Strasburg. Ky ishte një lëshim që ka mundur të përmirësohet nëse grupi teknik, Qeveria apo Parlamenti i Kosovës apo zyrtarë të lartë, të cilët kanë qenë pjesë e negociatave me shtetin e Holandës, do ta kërkonin këtë”, ka deklaruar Gashi për tesheshi.com.
Avokati Arianit Koci, për dallim nga gazetari Zeka mendon se Specialja nuk do t’i prekë Hashim Thaçin dhe Kadri Veslin.
“Nëse më pyetni privatisht se a do të akuzohet Thaçi, jam i bindur se ai nuk do të akuzohet nga kjo prokurori dhe nga kjo gjykatë”, ka deklaruar Koci.
Politologu Nexhmedin Spahiu, në një prononcim dhënë kohë më parë për portalin tesheshi.com ka pohuar se nëse ngrihen aktakuza ndaj zyrtarëve të lartë politikë, karriera politike e tyre do të dëmtohet rëndë.
“Së pari, të gjithë ata që do të akuzohen nga Tribunali special nuk është e thënë të dalin të pafajshëm. Disa edhe mund të dalin të pafajshëm si Ramushi e Fatmiri në Hagë, por nëse akuzohen, karrierat e tyre politike do të dëmtohet së tepërmi. Nëse, ta zëmë, nuk do ta akuzonte Ramushin, Haga ai tani akoma do të ishte kryeministër në mandatin e tij të tretë a të katërt. Tani, sado që doli i pafajshëm nuk arriti të kthehet në atë pozitë”, ka deklaruar Spahiu.
Personat ndaj të cilëve është ngritur aktakuzë pranë Dhomave të Specializuara, kanë të drejtë të kërkojnë kompensim në rast se ata shpallen të pafajshëm.
Gjykata pritet të funksionalizohet brenda vitit ndërkohë që tashmë është bërë e ditur se ajo do të vendoset në Hagë në ndërtesat e dikurshme të EUROPOL-it./tesheshi.com/
