Ndaj thirrjeve të fundit të drejtorit maqedonas në një shkollë të Prilepit, që nxënësit të dalin në protesta kundër platformës së shqiptarëve, gjegjësisht dygjuhësisë, deri tani kanë reaguar vetëm Avokati i Popullit në Maqedoni, Ixhet Memeti dhe Lëvizja BESA.
Avokati Popullit në kumtesën e sotme shpreh shqetësim për tentimet për involvimin e fëmijëve në protestat e organizuara në shumë qytete në Maqedoni.
“Në mënyrë më të ashpër i dënoj ngjarjet e personave udhëheqës në shkolla, dhe kërkoj prej bordeve shkollore, kryetarëve të komunave, Inspektoratit shtetëror arsimor dhe Ministrisë së Arsimit dhe Shkencës, menjëherë dhe pa menduar, secili në kuadër të kompetencave të tyre të ndërmarrë masa adekuate kundrejt personave të cilët agjitojnë ose lejojnë në shkolla të kryhet agjitacion dhe tentime për involvim politik të nxënësve”, theksohet në kumtesën e zyrës së Avokatit të Popullit.
Ngjarjet e tilla, siç është theksuar, janë në kundërshtim me Ligjin për arsim të mesëm me të cilin ndalohet çdo organizim, veprim politik ose fetar, dhe jashtë qëllimeve të arsimit-shkollës.
“Avokati i Popullit në vazhdimësi i ndjek ngjarjet e tilla për çka veçmë zhvillon procedurë edhe për iniciativë personale edhe për parashtresat e dorëzuara të prindërve dhe tregon se fëmijët në asnjë mënyrë të mos jenë cak i manipulimeve dhe keqpërdorimeve, duke e pas parasysh se ata sipas të gjitha rregullativave ndërkombëtare dhe vendore gëzojnë mbrojtje të veçantë”, shtohet në kumtesë.
Po ashtu edhe Lëvizja BESA dënon ashpër politizimin e shkollave fillore dhe të mesme dhe u bën thirrje institucioneve kompetente, siç është Ministria e Arsimit me Inspektoratin Shtetëror të Arsimit, por edhe institucione të tjera, që të ndërmarrin hapa për t’i dënuar këto sjellje dhe presione që u bëhen nxënësve dhe të punësuarve në shkolla nga ana e drejtorëve të shkollave.
“Në të njëjtën kohë shpresojmë që edhe akademikët dhe intelektualët e tjerë të arsyeshëm të vendit do të distancohen nga gjuha e urrejtjes, që sot dëgjohet edhe nga institucioni që do të duhej të ishte çerdhe e dijes dhe vlerave më të larta intelektuale, siç është ASHAM-I”, thonë nga BESA.
Ndryshe, ASHAM-i është institucion shtetëror(Akademia e Shkencës dhe Artit në Maqedoni), pjesë e së cilës nuk është asnjë shqiptarë, dhe që vazhdimisht mbështesin protestat e VMRO-DPMNE-së, kundër Platformës së Shqiptarëve.
Në fund, kujtojmë se ndaj drejtorit në fjalë i cili në formë publike ka porositur nxënësit maqedonas të lëshojnë mësimin dhe të dalin në protestë, ende nuk është marrë asnjë masë qoftë qortuese, apo sanksionuese nga ministri shqiptar i Arsimit dhe Shkencës, kuadër i BDI-së, Pishtar Lutfiu.
Më e dhimbshme se heshtja e ministrit shqiptar, në këtë rast është akti trimëror i nxënëses maqedonase, e cila ndërpreu drejtorin e shkollës, duke ia bërë të ditur se agjitimi politik nëpër shkolla është e ndaluar me ligj. /tesheshi.com/
