Gjyshi i Blaise Metreweli, kreut të ri të shërbimit të inteligjencës britanike MI6, ishte Constantine Dobrowolski, spiuni nazist i njohur si “Kasapi”, shkruan Daily Mail.
Blaise Metreweli u emërua më parë këtë muaj si shefja e parë femër e spiunazhit në historinë 116-vjeçare të Shërbimit Sekret të Inteligjencës Britanike.
Sipas një arkivi dokumentesh të publikuara nga Daily Mail, gjyshi i saj, Constantine Dobrowolski, ishte një bashkëpunëtor nazist i cili mburrej për vrasjen e hebrenjve. Dobrowolski, i cili ishte ukrainas, dezertoi nga Ushtria e Kuqe për t’u bërë informatori kryesor i Adolf Hitlerit në rajonin e Chernihiv, raportuan mediat britanike.
Metreweli, shkruhet gjithashtu, nuk e takoi kurrë gjyshin e saj. Ai mbeti në Ukrainën e pushtuar nga nazistët kur familja e tij iku nga Ushtria e Kuqe që çliroi rajonin në vitin 1943. Dokumentet e zbuluara në një arkiv gjerman thuhet se tregojnë se Dobrowolski njihej si “Agjenti Numër 30” midis nazistëve.
Në një moment, Bashkimi Sovjetik ofroi një shpërblim prej 50,000 rublash për Dobrowolskin – tani me vlerë gati gjysmë milioni euro – dhe e quajti atë “armikun më të keq të popullit ukrainas“.
Sipas të njëjtit burim, Dobrowolski donte të hakmerrej ndaj Rusisë për vrasjen e familjes së tij dhe konfiskimin e pronës së tyre në revolucionin e vitit 1917. Një dosje dyshohet se përmban një letër të shkruar me dorë nga Dobrowolski drejtuar eprorëve të tij nazistë, të nënshkruar: “Heil Hitler”. Në një tjetër, ai mburret se ka marrë pjesë “personalisht” “në shfarosjen e hebrenjve” dhe ka vrarë qindra ushtarë ukrainas.
Një zëdhënës i Zyrës së Jashtme, Komonuelthit dhe Zhvillimit tha: “Blaise Metreweli nuk e njihte ose nuk e kishte takuar gjyshin e saj nga babai. Sfondi i Blaise është i shënuar nga konflikti dhe përçarja dhe, si shumë me trashëgimi të Evropës Lindore, ajo ka vetëm një kuptim të pjesshëm të tij. Është kjo trashëgimi komplekse që ka kontribuar në angazhimin e saj për parandalimin e konfliktit dhe mbrojtjen e publikut britanik nga kërcënimet moderne nga shtetet armiqësore të sotme, si kreu i ardhshëm i MI6.”
Metreweli u rrit jashtë vendit përpara se të studionte antropologji në Kembrixh. Ajo iu bashkua MI6 në vitin 1999 dhe shërbeu në agjenci në Evropë dhe Lindjen e Mesme për dy dekada. Metreweli aktualisht mban pozicionin e Q, kreut të departamentit teknik të shërbimit, i bërë i famshëm nga filmat e James Bond. /tesheshi.com/
