Në Gjermani, ata që paguajnë qira të larta shpesh jetojnë më të varfër se sa tregojnë statistikat zyrtare. Shumë familje shpenzojnë më shumë se një të tretën e të ardhurave të tyre për strehim, dhe disa edhe më shumë se gjysmën.
Pas zbritjes së qirasë, shërbimeve komunale, interesit të kredisë dhe shpenzimeve të tjera, më shumë se 17.5 milionë njerëz mbeten me të ardhura që do të thotë se janë të varfër.
Në këtë përfundim kanë arritur studiuesit e Shoqatës për Mirëqenie të Barabartë, organizatë ombrellë e sektorit të pavarur social. Studiuesit analizuan të dhënat nga Zyra Federale e Statistikave gjermane.
Personat që kanë në dispozicion më pak se 60 për qind të të ardhurave mesatare në muaj konsiderohen të varfër. Të ardhurat mesatare janë të ardhurat nga të cilat saktësisht gjysma e popullsisë ka të ardhura më të larta dhe gjysma ka të ardhura më të ulëta.
Statistikat standarde të varfërisë injorojnë miliona njerëz sepse nuk marrin parasysh kostot e strehimit, thotë shoqata.
“Kushdo që shikon vetëm të ardhurat, dhe nuk merr parasysh që njerëzit kanë gjithnjë e më pak para në dispozicion për shkak të kostove të larta të strehimit, anashkalojnë shkallën e varfërisë në Gjermani”, thuhet në analizë.
Në fakt, 5.4 milionë njerëz më shumë jetojnë nën kufirin e varfërisë sesa mendohej më parë. Kur merren parasysh kostot e strehimit, më shumë se një e pesta e popullsisë konsiderohet e varfër.
Sipas këtyre përllogaritjeve, pragu i varfërisë për një familje me një anëtar është 1,016 euro të ardhura të disponueshme në muaj.
Si shembull, grupi hulumtues përmend një pensionist me një pension standard prej 1,770 euro. Me qira afatgjatë 450 euro, nuk konsiderohet i varfër.
Megjithatë, nëse i duhet të zhvendoset, për shembull, në një apartament të përshtatshëm për personat me aftësi të kufizuara dhe papritmas paguan 900 euro qira, ai bie nën kufirin e varfërisë.
Më të prekurit nga e ashtuquajtura varfëri e banesave janë të rinjtë nën moshën 25 vjeç – mes tyre shumë studentë – si dhe ata mbi 65 vjeç.
Individët që jetojnë vetëm kanë kosto më të larta se çiftet sepse zakonisht kanë kosto më të larta strehimi. Është më e vështira për pensionistët e vetmuar, shkruan DPA. /tesheshi.com/
