Ndërsa Hamburgu, mikëpritësi i samitit të G20, po zhytet ngadalë në kaos, shumë vrojtues në mbarë botën për herë të parë i kanë kushtuar vëmendje demonstruesve me fytyra të mbuluara e të veshur tërësisht në të zeza.
I quajnë “Blloku i zi”. Ky në të vërtetë nuk emër i një grupi por i një taktike të përdorur, shkruan sot Deutsche Welle.
Ata janë të veshura me të zeza nga koka deri te këmbët, vënë shami apo maska mbi fytyrat e tyre, apo dhe kapela, madje shpesh edhe syze dielli.
E gjithë bota ka dëgjuar për ta në prag të samitit, pas përleshjeve me policinë, edhe pse, sipas raporteve të medias, ata nuk janë shkaktarë të këtyre përleshjeve.
Por ata u janë bashkangjitur me ëndje atyre, me ç’rast në drejtim të xhandarmërisë kanë fluturar përzierje molotovi, gurë dhe shishe.
Sipas DW, i quajnë “Blloku i zi”, edhe pse ata nuk e kanë emërtuar veten e tyre kështu.
Të premten në mbrëmje, sipas policisë, rreth 1,500 prej tyre kanë boshatisur rrugët e Hamburgut, ndërkohë që pas tyre kanë lënë makina të djegura dhe dritare të thyera të dyqanit.
Siç thekson DW, edhe pse emri sugjeron se bëhet fjalë për një lloj një grupi, “Blloku i zi” në fakt është një taktikë e protestave në rrugë, shpesh të dhunshme. Kështu quhen zakonisht demonstruesit të cilët ndërhyjnë në mesin protestuesve të pakënaqur por të qetë, duke e mbajtur të fshehur identitetin e tyre nga kamerat e policisë përmes vënies së maskave në fytyrë.
Kjo është e ndaluar sipas ligjit gjerman për tubime, dhe ishte arsyeja fillestare pse policia kishte ndaluar kolonën e protestës, thuhet në DW.
“Blloku i zi” në Hamburg ka mbledhur majtistët radikalë, anarkistët dhe aktivistët autonomë. Edhe pse kanë të përbashkëta rrobat, rezistencën ndaj sistemit dhe gatishmërinë për dhunë, personat në të zezë në fakt përfaqësojnë ideologji të ndryshme.
Përveç komunistëve të cilët, siç dihet, avokojnë për një shtet të fortë social, ka edhe anarkistë të cilët do të preferonin heqjen e plotë të shtetit, vlerëson DW.
Janë të lidhur edhe ndërkombëtarisht. “Kryesisht kam dëgjuar se flasin italisht dhe spanjisht. Këta janë njerëz të cilëve më së paku u intereson se si do të duket Hamburgu të hënën”, tha një grua në rrugët e Hamburgut për Deutschlandfunk.
Ndërkohë, rrobat janë bërë mënyrë e identifikimit të tyre, apo sinjal i gatishmërisë së tyre për dhunë.
Siç thuhet, kjo mënyrë e hedhjes së dorashkave në fytyrën e shtetit është bërë e njohur në vitin 1980 në Gjermaninë Perëndimore gjatë protestave kundër energjisë bërthamore.
Gjatë samitit të G8 në qytetin gjerman të Rostock në vitin 2007 “Blloku i zi” gjatë një incidenti pati plagosur afër 400 policë.
Departamenti për mbrojtjen e rendit kushtetues ka vlerësuar se sot në Gjermani ka rreth 28,500 “ekstremistë të mundshëm të krahut të majtë.”
“Policia është armiku i preferuar i tyre por edhe ata janë armiku i preferuar i policisë”, është sentenca që shqëron aktivitetin e tyre të dhunshëm.
Ndiqni videon:
Përgatiti: Jeton Zenuni – /tesheshi.com
