Me dhënien e pafajësisë për grupimin e ashtëquajtur “Hakmarrja për Drejtësi”, duket se kjo sagë merr fund, ndoshta juridikisht, pasi nga ligjërimi politik zorr se do dalë, së paku sa të jetë Berisha aktiv në politikë.
Ky grupim, të cilit i atribuohen shumë akte kriminale që nga mesi i viteve ’90-të e ketej, deri në vrasjen e Genci Sinës, shoferit të ish-kryeprokurorit Sollaku, ka patur vetëm një viktimë në radhët e veta. Ai është Enkelejd Agai, një rast kurrë i zbardhur.
Agai u gjet i djegur brenda automjetit të tij në malin e Dajtit, ngjarje vitit 1998.
Në dosjen e “Hakmarrjes për Drejtësi”, ai rezulton si një nga dëshmidhënësit e veprimtarisë kriminale të grupit, pasi u arrestuar aty nga viti 1996, për t’u liruar më vonë gjatë ngjarjeve të vitit 1997.
Sakaq, sipas dosjes hetimore, aktiviteti kriminal i “Hakmarrjes” nuk është i kufizuar vetëm tek bomba ndaj VEFA-s; vrasja e kreut të burgjeve, Bujar Kaloshi; apo vrasja e shoferit Sina në mes të Tiranës. Këtij grupimi i atribuohet një sërë aktesh të tjera, të cilat, pas shpalljes të pafajshëm, mbeten pa autor.
Ja cilat janë:
Vjedhje me armë në filialin e VEFA-së në Vlorë, më 12.01.1996, ku janë grabitur rreth 145 mijë dollarë.
Vjedhja me armë e Bankës Kombëtare Tregtare në Vlorë, më 18.04.1996, ku janë grabitur lekë dhe valutë e huaj, si lireta e dhrahmi, që kapin shifrën e rreth 2.2 milionë lekëve të reja.
Vrasja e Bujar Kaloshit, më 26.07.1996.
Vjedhja me armë e argjendarisë “Agron”, ku u vodh flori dhe rreth një milion lekë.
Vjedhja me armë e Bankës Kombëtare në Vlorë, dy herë gjatë mesit të vitit 1994.
Vjedhja me armë e selisë së shoqërisë “Japa”, më 13.4.1994, ku janë vjedhur rreth 53 mijë dollarë.
Vjedhja me armë e selisë së shoqërisë “Japa”, me pasojë plagosjen e rojës së ndërtesës Eduart Trimi, ku u vodhën rreth 3500 dollarë.
Vjedhja me armë e firmës “Gjallica” në Vlorë, ku u vodhën 2.4 milionë lekë të reja, me pasojë plagosjen e financierit.
Vjedhja me armë me pasojë vdekjen e shtetasit Pirro Korini, punonjës i VEFA-s.
Vjedhje me armë e fabrikës “Albafon” në Laprakë, ku u vodhën rreth 940 mijë lekë të reja.
Vjedhja me armë e kompanisë “Butongas”, më 3.3.1995, ku u vodhën rreth 430 mijë lekë të reja.
Vjedhja me armë e shoqërisë së sigurimeve INSIG, më 21.2.1995, ku u vodhën 156 mijë lekë të reja, me pasojë plagosjen e punonjësit të kësaj shoqërie.
Vjedhje me armë me pasojë vdekjen e Sami Jatës, në dhjetor të vitit 1995, ku pas vrasjes nuk u bë e mundur vjedhja.
Vjedhja me armë e pikës së karburantit “Shkumbini Petrol”, më 21.1.1995, ku u vodhën 2.6 milionë lekë të reja.
Vjedhjen me armë të Bankës së Kursimeve në Vlorë, më datë 20.1.1995, ku u vodhën rreth 2.6 milionë lekë.
Rrëmbimi i fëmijës Erion Nushi, që u mbajt tri ditë dhe u la i lirë, pa i marrë gjobën e 200 mijë dollarëve amerikanë, më datë 31.10.1995.
Vendosje eksplozivi në kompaninë VEFA, më datë 26.2.1996.
Vjedhja e Bankës së Kursimeve në Tiranë, më 29.1.1993, ku janë vjedhur rreth 307 mijë dollarë amerikanë. /tesheshi.com/
