Që Ben Blushi do të sulmohej, kjo dihej nga Edi Rama në Asamblenë e sotme të Partisë Socialiste. Por lajmi është që nuk u anatemua. Që kërkesa e tij për të sfiduar Ramën nuk miratohej kjo dihej, por lajm është që gjithçka u zgjidh pa asnjë problem.
Atëherë, çfarë ishte teatri që u luajt tek një resort në periferi të Tiranës?
Shumë e thjeshtë: ishte një pazar ku Edi Rama bëri me disa “senatorë” që ishin të pakënaqur me të cilët “nënshkroi” një marrëveshje për të vazhduar statukuonë. Pra, kush humbi dhe kush fitoi nga Asambleja e sotme e PS-së?!
Fituan shumë. Fitoi Arta Dade që sot nuk e vuri firmën e saj tek dokumenti i Ben Blushit, ndërkohë që dy javë më parë ishte mbështetësja e saj kryesore. Vetëm një javë më parë gazeta që ka pronar djalin e Arta Dades sulmoi egër Ben Blushin dhe të nesërmen, senatorja-deputete e Korçës doli në 8 mars duke shkëmbyer batuta me “karafilin” Edi Rama.
Dade siguroi edhe për 4 vjet kandidimin për deputete që brenda ka edhe shumë gjëra të tjera. Ndërkohë Gramoz Ruçi, rifitoi pozicionin e humbur këtu e dy vjet më parë, atë të numrit dy që për disa kohë nuk do t’ia heq Edi Rama, i cili ishte betuar ndërkombëtarëve që nuk do të kishte asnjë ish-komunist në kupolën e PS-së.
Fitoi Fatmir Xhafa, i cili është kandidat potencial për anëtar qeverie.
Kurse të humburit ishin disa: në radhë të parë anëtarët e qeverisë që nuk dolën në rang të parë, nuk u promovuan, dhe që fshehën mundësinë që mund të ketë sërish ndryshime.
Po Ben Blushi?! Mbeti ai që ishte: njeriu që ka vënë kavanozin për të zëvendësuar Edi Ramën.
Oh, se harruam: edhe Pandeli Majko, i cili shpreson se do të bëhet President në 2017-n, por është ende herët për këtë lojë, ku në fushë gjërat po lëvizin më shpejt sesa mendon ish-kryeministri. Po me siguri mandatin e deputetit në Tiranë e ka siguruar. /tesheshi.com/
