Drejtori i Parandalimit të Pastrimit të Parave, Alket Hyseni dhe drejtor i Drejtorisë së Sigurimit të Informacionit të Klasifikuar, Arben Seferi, kanë sot dhënë dorëheqjen si shkak i nisjes së vettingut. Po kush janë këta dy të vetëberë kurbanë për hir të reformës në Drejtësi…
Vettingu i drejtësisë ka nisur me “prerjen e kokave” të dy njerëzve të besuar të kryeministrit Edi Rama. Dy drejtorë shumë pak të njohur publikisht, por shumë të rëndësishëm për postet kyç që mbanin pranë Kryeministrisë kanë dhënë sot dorëheqjen si pasojë e nisjes së Vetingut.
Bëhet fjalë për Drejtorine Parandalimit të Pastrimit të Parave, Alket Hyseni dhe drejtorine Drejtorisë së Sigurimit të Informacionit të Klasifikuar, Arben Seferi. Për shkak të rëndësisë që kishin detyrat që ata kryenin në procesin e vettingut të dy kanë dhënë dorëheqjen, siç kuptohet të kërkuar nga ndërkombëtarët që po monitorojnë këtë proces.
Hyseni ka sqaruar në dorëheqjen e tij se po ikën për të mos krijuar aludime ndaj emrit të tij pasi nga opozita shihet si një njeri i besuar i Ramës.
“Jam i përgjegjshëm se reforma në drejtësi është një proces i pakthyeshëm, e duke qenë i bindur se është në interesin e të gjithë shqiptarëve që ky proces të zhvillohet sa më shpejt ndjej se largimi im nga funksioni që kryej do të shërbejë për të eliminuar çdo alibi të të gjithë atyre që frikësohen nga reforma dhe pikësëpari nga vettingu”, shkruan Alket Hyseni në kërkesën paraqitur kryeministrit dhe ministrit të Financave.
Drejtoria e Pastrimit të parave që drejtohej nga Alket Hyseni, e varur nga ministri i Financave, ka një rol kryesor në hetimin e pasurisë së gjyqtarëve dhe prokurorëve.
Nga ana tjetër dorëheqja e Seferit nuk është zbardhur akoma, por dhe ai ishte një emërim direkt i Ramës dhe kishte një karrierë të gjatë në shërbimet intiligjente.
Alket Hyseni, gardiani i statutit të PS-së
Jurist dhe pedagog i ligjit, Alket Hyseni, mbante deri para një viti detyrën e kryetarit të Komisionit të Garancive Statutore në Partinë Socialiste. Ai ishte interpretuesi i këtij statuti në betejën e madhe mes Ben Blushit dhe Edi Ramës për mungesën e zgjedhjeve për kryetar në parti.
Kur Rama u akuzua nga Blushi se kishte shkelur statutin duke mos kryer sipas përcaktimit në të të zgjedhjeve për kryetar brenda partisë, Hyseni e kundërshtoi duke thënë se Statuti nuk ishte shkelur. Ai mbrojti dhe idenë e Ramës për referendum në parti si një votbesim për kryetarin Rama pa kandidat përballë duke shënuar një risi që ndodhte për herë të parë në një parti politike në demokraci.
Vetëm disa ditë më parë Hyseni raportoi tek Rama për punën e bërë në krye të DPPPP-së. Sipas tij kishte një rritje në 411 të numrit të rasteve të dyshimta të dërguara në institucionet ligjzbatuese, Polici dhe Prokurori. Sipas raportit të tij “gjatë vitit 2016 janë bllokuar afro 29 milion Euro nëpërmjet 61 urdhrave administrativ të DPPPP”.
Hyseni ka karrierë të gjatë si pedagog dhe mban titullin Doktor i Shkencave Juridike dhe titullin “Avokat”.
Më parë ai ka punuar sikryetar i Task Forcës së Kryeministrit për Pronat e Paluajtshme Shtetërore, detyrë të cilën e ka ushtruar deri në Janar 2016. Ndërsa gjatëviteve 2000 – 2005 ka ushtruar funksione të ndryshme në Drejtorinë e Përgjithshme të Doganave.
Arben Seferi, çertifikuesi i sigurisë
Me një profil të ulët publik, deri sot kur dha dorëheqjen nga një detyrë e rëndësishme që mbante prej vitti 2014, si drejtor i Drejtorisë së Sigurimit të Informacionit të Klasifikuar, Arben Seferi ishte pothuajse i panjohur.
Edhe dorëheqja e tij ashtu si e Hysenit vjen për shkak të vetingut, si një kërkesë e ndërkombëtarëve. Detyra e “çertifikuesit të sigurisë” për zyrtarët e lartë iu besua nga Edi Rama në vitin 2014,duke pasuar ish-drejtorin Shyqyri Dekavelli.
Seferi, i datëlindjes 1960, mësohet se për një periudhë rreth 20-vjeçare, ka kryer funksione të larta në Shërbimin e Inteligjencës Shqiptare.
“Ka një përvojë të gjatë në sektorin publik, menaxhimin dhe koordinimin e resurseve njerëzore. Deri në marrjen e detyrës pranë DSIK-së, ka ushtruar profesionin e avokatit duke gëzuar edhe titullin “Avokat”. Për një periudhë rreth 20 vjeçare, ka kryer funksione të larta në Shërbimin e Inteligjencës shqiptare. Ka kryer studimet e larta në Akademinë Ushtarake, në specialitetin zbulim; në Fakultetin e Drejtësisë të Universitetit të Tiranës, dega Juridik.Gjatë karrierës së tij ka kryer kurse e trajnime në shërbimet partnere, si në fushën e sigurisë, ashtu dhe në luftën kundër terrorizmit”- thuhet në CV e tij në faqen zyrtare të dikasterit që drejtonte.
Po çfarë bën DSIK?!
Kjo drejtori e rëndësishme ka detyrë që të bëjë certifikimin e të gjithë zyrtarëve shqiptarë, që nga më i thjeshti dhe deri tek më i larti. Kjo çertifikatë jepet për ata nëpunës apo zyrtarë që marrin në zotërim apo kontrollojnë informacione të klasifikuara si sekrete, tepër sekrete apo konfidenciale. Për dhënien e çertifikatës së sigurisë DSIK-ja ka një procedurë të posaçme, e cila pasohet me bashkëpunimin e SHISH-it apo dhe të organeve të tjera të shërbimit inteligjent për verifikimin e zyrtarëve.
Me anëtarësimin e Shqipërisë në NATO, Drejtoria e Sigurimit të Informacionit të Klasifikuar u bë si pjesë e organeve inteligjente të aleancës ushtarake euroatlantike. DSIK-ja ka marrëdhënie bashkëpunimi me strukturat e NATO-s dhe me strukturat homologe të vendeve të tjera anëtare apo partnere të NATO-s. DSIK-ja përgatit, negocion dhe nënshkruan “Marrëveshjet për mbrojtjen e përbashkët të informacionit të klasifikuar ndërmjet Këshillit të Ministrave të Republikës së Shqipërisë dhe qeverive të vendeve të tjera”. /tesheshi.com/
